آی آراز، بیر دالغا وور، دریا كیمی طوفان ائله
ظالمین ییخ قصرینی، اؤز باشــــینا ویران ائله
زوره محكوم ائیله‌ییب، ایندی طبــیعت بیزلری
زور دئــــیه‌ن جلّاد ایله، بیزلر آرا دیوان ائله
بیر هجوم ایله داغیت، شیطانلارین كاشانه‌سین
او فســـاد و فتنه قصرین، خاك‌له یكسان ائله
وئرمه امكان بوندان آرتیق هر شرفسیز انـسانا
آز بو یولسوز كسلری، دل مولكونه سلطان ائله
تؤكدو ناحق، سئل كیـمی، بیهوده قارداشلار قانین
كئچمیشی سال خاطره، بیر قانه یوز مین قان ائله
سو ده‌ییل ســـندن آخان، قانه دؤنن گؤز یاشی دیر
بو اَسَف احوالی گؤر، طوفان قوپار، عصیان ائله
بیر ـ بیریندن، سن بو قان قارداشلارین سالدین اوزاق
گل بو سرگردانلارین، هر موشــگولون آسآآآآان ائله
بیر قیلیج تك اورتادان كسدین محبّت رشته‌سین
آز بو مئــــیداندا شرارت مركبیـــــن جولان ائله
قاضی اول، انصافه گل ، حكم زامان وئر تازه‌‌دن
غصــــــب اولان تورپاقلاری، وابستة ایران ائله
كؤكله‌مه هجران سازین، دل سوزونو آرتیرما چوخ
وصــــلدن سال صـــــحبتی، گل چارة هـــــجران ائله
قارداشی ـ قارداشا چاتدیر، جانی هجراندان قوتار
بو آغیر بیر خسته‌لیك‌دیر، خسته‌یه درمان ائله
نه «شمالی » نه « جنوبی»؟ آت بو چیركین سؤزلری
مولك ایراندیر تماماً، دونیایا اعلان ائله
لعنت او شاهه كی، وئردی باده ملك ایرانی
یاده سالدیقجا او شاهی، لعن ائله، افغان ائله
فتحعلی شاه ائیله‌دی، فاحش خیانت ایرانا
سنده خدمت گؤستریب، نقصانلاری جبران ائله
توركمن چای پیمانی، بیر ننگ دیر تاریخده
عُرضه‌سیز شاهین ایشین دونیالره اعلان ائله
كئچدی اون یئددی شَهَر روسیّه‌نین چنگالینا
بو جنایاتی گتیر یاده، بوگون عنوان ائله
گولستان پیمانی‌دا سیندیردی ایرانین بئلین
بو ایشه باعث‌لره، یارب اؤزون دیوان ائله
گل گتیر بو ملّته آزاده‌لیك فرمانینی
ملك ایرانی صفاده روضة رضوان ائله
تهمت و تحقیر اوخو، هر سمتیدن یاغماقدادیر
سینه‌وی بیر داغ كیمی، بو اوخلارا قالخان ائله
یا اؤزون چك بیر كناره، غصب اولان مرزی گؤتور
یا ایكی روحو سازاشدیر، دل‌لری شادان ائله
شــــــــــــــــیدا نین دائیم فراق یاردن آغلار گؤزو
گؤستر او شوخون جمالین، گول كیمی خندان ائله
يازينين قالاني
