هر كس كی دئسه دردیمی دلداره منیم چون

گویا كی طبیبیمدیر ائدیب چاره منیم چون

بیر بولبولم اؤز ناله ی زاریم منه بسدیر

كیم یالواراجاق گولدن اؤتور خاره منیم چون

بیر لاله روخون من یئنه زولفونده اسیرم

گؤردوكده دئییر خلق گونو قاره منیم چون

جاندان كئچه رم بیر ائله حال اهلی اولایدی

دردیم دئییب اول دلبره یالواره منیم چون

پروانه ده اولسایدی اگر منده اولان عشق

یوز شؤق ایله چیرپاردی اؤزون ناره منیم چون

هیچ بیر كسه راضی دئییلم یار یولوندا

منت چكه بوندان بئله اغیاره منیم چون

باشدان باشا واحید ، بوتون عالم گوزل اولسا

آرتیقدیر هامیدان یئنه مه پاره منیم چون

علی آقاواحید

ساقی، نه دوروبسان، ائله بیر رقص حسابی،
وئر بادۀ نابی.
آزاد ائله بیر جام ایله بو مست و خرابی،
پاك ائیله حسابی.
یاران، نه قیلیم غم گونو بیر غئیر علاجیم،
یوخ باده دن اؤزگه.
بو قانی ایچیب یاد ائدرم غنچه تورابی،
اول عطر و گولابی.
اود توتدو تمامی بدنیم یاندی سراسر
بو نار فراقه.
من نئیله میشم كیم، چكیرم مونجا عذابی،
بو جؤور و ایتابی؟
ساقی، هله بدمست لیك ائتمك بئله دمده
هرگیز دئییل اینصاف.
ییخدین ائویمی، بیر ده آت اول تیر شهابی،
اول برق لحابی.
ای موطروب خوشخوان، ائله بیر رقص مخالف،
جانیم سنه قوربان.
تؤك زولفونو، افشان ائله اول چتر قوبابی،
وئر كاكیله تابی.
هر وقت كی، دوشر یادیمه اول نرگیس مخمور،
ای لاله عذاریم.
لبریز ائدرم قان ایله بو چشم پر آبی،
بو منز یل خوابی.
ای وادی وحدتده قالان عاشیق مهجور،
سركشته و رنجور،
مئیخانه ده گئت رهن ائله قرآن و كیتابی،
قالدیر بو حجابی.
قویما منی، موشكولدو، قاللام زار و پریشان،
ای مضحر باری.
گؤستر منه اؤز نورین ایله راه ثوابی،
فتح ائیله بو بابی.
مندن سورا بیللم كی، قالیر باشینا داغلار،
“مجنون” دئیر، آغلار!
آخ، یادیمه سالدین گئنه ایّام شبابی،
چك-چك بو طنابی!
بو مولك قراداغده بیر عاشیق عریان
همواره گركدیر.
نه بنگی اولا، نه اولا یاقوت موزابی،
نه جام شرابی.
هر عاشیقی گؤردوم، ائلدیم دردیمی اظهار،
احوالیمه یاندی.
بیر آه چكیب، چالدی یئره چنگ و روبابی،
وئردی بو جاوابی:
هرچند كی، بیمار غم عشقه دوا یوخ،
بیر سؤز دئییم آمما،
یئیدیر بو مریضه گئنه بئه دانه لعابی
یا شربت آبی.
تفتیش ائده بیر كیمسه كی، بو عاشیق عریان
ساكیندی نه یئرده.
گل اوشتیبینه، تیخ اوزومو، ناری، دوشابی،
آت تاخچییا قابی!
بسدیر بو قدر آغلما، بیچاره نباتی،
دیلداردن آیری.
ذكر ائیله دمادم گئنه بو عرش جنابی
بیر خیضر-نیقابی.
غم دفعینه، ساقی، منه بیر جام لبالب
قیل لطفو عنایت.
خوناب یئدیرمه منه، چك شیشه كبابی،
وئر جام شرابی.
اول گوشۀ چشمینده اولان خال سیاهین
دوشمندی بو جانه.
قویسان یئیرم من بو دم اول نحس غورابی،
چوخ چوخدو ثوابی.

سیدابوالقاسم نباتی

نه مجنونام كی وحشت ائیله یم لیلا جفاسیندان

دوشم صحرایا سرگردان غم عشقین بلاسیندان

نه فرهادام كی داغلاردا وورام اوز باشیما تیشه

قوتارماقچین بو شیرین جانیمی هیجران بلاسیندان

وطنده جورو جانان خوشدور ، غربت ایچره راحتدن

خداوندا قورتارما منی جانان جفاسیندان

كولاهیندان چیخارتدیم كاكیلین یالوارا یالوارا

ایلانی آری شیرین دیل چیخاردار اوز یوواسیندان

سگ كوی حبیبیمله قدیمی آشنادیر دل

خداوندا آییرما آشنانی آشناشیندان

اولسایدی میسّر، گـؤزه لیـم، یـاریـن اولاردیـم

هر لحظه غمین چكمگه غمخوارین اولاردیم

هر شب دولاشیب صبحه كیمی شمع ِ جمالین

پـروانـه كیمـی، طـالـبِ دیـداریــن اولاردیــم

ممكن كی دئییل بیرده گـزیـم گلشـن ِ كـویـون

ممكـن گـر اولایـدی، یئنـه زوّاریـن اولاردیـم

ای طوطی وشیم، آیئنـهٔ حُسنـونـو گـؤرجـك

آلــودهٔ اول لعــل ِ شكــر بــاریــن اولاردیــم

مجنون كیمی دایم، سـر كـویـونـدا گـزه ردیـم

عؤمـروم نقـدر وارسـا، پـرستـاریـن اولاردیـم

یوسیف كیمی وئرسه یـدیلـه دینـدارینـا قیمـت

جان نقدی ایلـه مـن ده خـریـداریـن اولاردیـم

واحید، سر ِ كویوندا گزه ردیم گئجـه ـ گـونـدوز

ای مـه، بـو ادا ایلـه دل افكــاریــن اولاردیــم

علی آقاواحید

بنی ذكر ائتمز ائل ، افسانه-ی مـجنونا ماییلدیر

نه بنزر اول بنا ، دردی آنین تقریره قاییلدیر

بیابانگرد مـجنوندان غم و دردیم سوال ائتمن

نه بیلسین بـحر حالین اول كی منزلگاهی ساحیلدیر؟

بنیم تك اولا بیلمز شهره ی شهر بلا مـجنون

قبول ائلرمی بو روسوالیغی هر كیم كی عاقیلدیر ؟

نه مشكیل حالی اولسا عاشیقین ، معشوق ائدر چاره

گر اول بیدرد بیلمزسه بو حالی ، حال مشكیلدیر

فراق ایامی سئیلاب سرشكیمدن خبـر توتـماز

قیامت ماجراسیندان گور اول ظالیم نه غافیلدیر

فقیه مدرسه معذوردور انكار عشق ائتسه

یوخ ئوزگه علمینه انكاریـمیز ، بو علمه جاهیلدیر

فضولی ! ائل سنی مـجنوندان افزون دئر ملامتده

بونا منكر دگیل مـجنون ، دخی معقوله قائیلدیر

فضولی

ائیله دی آخر فلك اول گولعذاریمدان منی
سالدی دشت غربت ایچره كوی یاریمدان منی

ناقۀ سرگشته تك صحرا دولانسام، نئی عجب
كیم، فلك بیداد ایله اوزموش قاطاریمدان منی

هجردن رنگیم سارالدی، شكر كیم، صراف عشق
ایندی تانیر بو زر كامل عیاریمدان منی

قالدی، من گئتدیمسه، ای نامهربان، كویینده دل
باری گه گه سور دل بی اختیاریمدان منی

شهر تفلیسین چلیپا باغلایان ترسا لری
قورخورام كیم، آییرا آخردا تاریمدان منی

سیّدا، من اول محبت اهلییم آفاقده
كیم، تانیر اهل نظر خاك مزاریمدان منی

سیدعظیم شیروانی

وورما اوقاره تئللرینه شانه سئوگیلیم

ائتمه منی بلاكش دیوانه سئوگیلیم

یاندیردی حسرتین منی، گؤستر جمالینی

كؤنلوم اولوب اول آتشه- پروانه سئوگیلیم

بیر دفعه ائیله دیمسه، تمنای وصلینی

یوز دفعه یاندیم- آتش هجرانه، سئوگیلیم

گزمه رقیبله منی غیرت هلاك ائدیر

سالما بلالی عاشقینی قانه سئوگیلیم

گؤسترمه قاره خالینی، كؤنلوم فغان ائدیر

قوش، ده‌ن، گؤرنده تئز گلیر افغانه سئوگیلیم

یوز لیلی گؤرسه حسنونی مجنون اولار سنین

عشقینده اوز قویاردی بیابانه سئوگیلیم

انصافی اولسا چرخ، بو بیچاره   واحیدی

حسرت قویارمی، سن كیمی جانانه سئوگیلیم؟

علی آقاواحید

بیر اوزو گول ، رنگی لاله ، زلفو تر
گشته چیخیب ، دره ر تازه بنؤوشه
دسته – دسته سانجیب بوخاغ یانینا
یاراشیبدیر او شاهبازا بنؤوشه

 جسمی مرمر حلقه زولفلری قارا
اونو گؤرن مجنون اولار آوارا
هؤروب ساچلارینی سالیب قاطارا
دوزوب تئله ، هم قوتازا بنؤوشه

یاشی اون سككیزه یئنی جه یئتمیش
گؤزللیكده تامام خلقی مات ائتمیش
گشته چیخمیش یار گلدیین ائشیتمیش
داغا سالیب بیر آوازا بنؤوشه

زلفون آچیب آغ قوللارین چیرماسین
ائله گزسین ، اونو رقیب گؤرمه سین
اغیار ایله چیخیب سئیره ، درمه سین
لایق اولماز انلامازسا بنؤوشه

سن ساللانیب قاباغیمدان گئده نده
هرگز قالماز صبر و اختیار منده
واقف زلف لرینی تعریف ائده نده
گرك دیر كی اول یازا بنؤوشه

ملاپناه واقف