عؤمور یولاریندا آغاردی بیرچك

  آی ائللر ، آتالار عالیم دی گئرچك 

  جوت اولسا میلچك ده قالیب گله جك  

  تك اولان آصلانا یازیغیم گلیر .

  خیلقتین سیررینی دویا بیلمیرم

  هر سؤزو آشیكار دئیه بیلمیرم 

  نییه سیزیلداییر ، نییه بیلمیرم  

  ناله لی كامانا یازیغیم گلیر .

  گؤزومدن یاش آخیر اوزومه دن - دن

  آمان آی آیریلیق اولمویایدین سن

  بیر اؤلوم یاخشیدی سئویلمه مكدن 

  طالعسیز جاوانا یازیغیم گلیر .

  ایگید ار آدلانار غئیرت اولاندا

  اوزده حیا اولار ، عیصمت اولاندا  

  دیل بیلمز نادانا قیسمت اولاندا  

  اهلی - حال جانانا یازیغیم گلیر . 

  بیر آن چاتیلمازمی قاشی اووچونون 

  آخمازمی گؤزوندن یاشی اووچونون  

  دینده گول-لسی ناشی اووچونون 

  یارالی جئیرانا یازیغیم گلیر .

  دؤورون گردیشینه اویا بیلمه ییب  

  قلبیندن قوباری یویا بیلمه ییب 

  عشقینی كیمسه یه دئیه بیلمه ییب 

  گیزلیجه یانانا یازیغیم گلیر . 

  ظالیم زامان كیمی ائتدی بختییار  

  اوركلرده كدر ، حسرت ، اینتیظار  

  آمان آللاه داغلار بویدا دردی وار 

  بهمن تك اوزانا یازیغیم گلیر .

بهمن وطن اوغلی

هر در دینه قالان كسده درمان اولا چتیندی

هر اوخویان عالیم اولان ، لقمان اولان چتیندی

هر ایاق اوسته یئرییه ن انسان اولا چتیندی

بو دونیا نین قوجاغیندا ، جسدده وار ، جان دا وار

دوغرو یولدا گزسن اگر شهرت ده وار ، شان دا  وار

دوغـــــرو یولدان آزسان اگر ، قادا دا وار ، قان دا وار

آتالار گـــــوزه ل دئییب كی ، حاق نزیله ر اوزوامه ز

گئج ائیلییه ر،گوج ائیلییه ر حاق دا وار ، دیوان دا وار

وطن اوغلو  خوش سوزلره خوش اویاجاق دونیادا

گاه سئوینجی ، گاه كده ری داشییاجاق دونیادا

نقده ر كی بنی انسان یاشییاجاق دونیادا

ناداندا وار ، قانان دا وار ، گدا دا وار ، خان دا وار

بهمن وطن اوغلی

یارپاق اولوب تورپاغینا توكولسم

عؤمور  امانت دیر،  بیلین  آی دوسلار

 بوگون ائله بیلكی تانیمیر منی

دوست دوست اولسا؛هرآرخالی نادانین