سئوگیلیم، ائل بیلیر من اهلی-دردم،
سندن باشقاسینی سئوسم نامردم
غصه دن اؤلورم نئیلیم كی، هردم،
منی قویوب باخیر یانا گؤزلرین.
كیپریگین خنجردیر، قاشلارین كامان،
ییخدیغین عاجیزه وئرمزسن آمان.
دئدیلر جلّادسان، ائتمزدیم گومان،
سالاجاقدیر منی قانا گؤزلرین.
سنین الینده دیر هر اختیاریم،
ظالیم،اؤلدور منی غمدن قورتاریم،پ
بس كیمه سؤیله ییم، كیمه یالواریم،
گتیریب دیر منی جانا گؤزلرین.
كؤنلومو سالاجاق زولفون كمنده،
حسرتین قویماییب جان قالسین منده،
او گؤزلر وار ایكن نه قدر سنده،
آلاجاق كؤنلومو سونا گؤزلرین.
واحیدم ،سئوگیلیم، منده قانیرام،
فتنه كار گؤزلی اوزدن تانیرام،
نئجه دئییم سنه، غمدن یانیرام،
منیم تك اود توتوب یانا گؤزلرین
علی آقا واحید
