یئنه قیلینجی چكدی اوستومه،
قوربانی اولدوغوم او آلا گؤزلر
یئنه جلاد اولوب دوردی قصدیمه،
قلم قاش آلتیندا پیالا گؤزلر
باشیمدان گئتمیشدی سئودانین غمی،
خیالیم گزیردی بوتون عالمی
بو دوستاق كؤنلومی، دئیین، ینه‌می
چكدینیز سورغویا، سئوالا، گؤزلر؟
سودا یولچوسویام ازل یاشیمدان،
كؤنلوم آیری گزیر جان سیرداشیمدان؛
داغی‌دیر هوشومی آلیر باشیمدان
سوزولوب گئدنده خیالا گؤزلر
گرد‌نین مینا‌دیر، بویون تماشا،
آی‌دا حسد چكیر او قلم قاشا
بیر جوت اولدوز كیمی وئریب باش- باشا،
یانیب شعله سالیر جمالا گؤزلر
منیم سئوگیلیم‌دیر او گؤزه‌ل پری،
قوی اوزه وورماسین كئچن گونلری
من قدیر بیلنم ازلدن بری،
سیزینله یئتمیشم كمالا، گؤزلر
جهاندا هر حكمی بیر زامان وئریر،
دونن دوران سورن بوگون جان وئریر
ایللر خسته‌سی‌یم، یارام قان وئریر،
سیز منی سالدینیز بو حالا، گؤزلر
صمدوورغون
