^{آواره او اوغلاندیكی جانانه سی یوخــدور}

^{بیچاره ده اول قیزدیكی دیوانه سی یوخدور}

^{قیز ائوده گوزو یولدا قالیب ائلچینی گوزلور}

^{اوغلانداكی ائولنمه گه كاشانه سی یوخدور}

^{یاندیقجا توكور گوزیاشینی صبحه كیمی شمع}

^{دورونده طــواف اتمه گه پروانه سی یوخـدور}

^{اوغلان گوروسن قیرخا چاتیب سنّی سوبایدیر}

^{سن پوللی نشان وئركی حرمخانه سی یوخدور}

^{شاعیــــركی دئیر نعره مســــــتانه چكن یوخ}

^{ویران اولا بو شـــهری كی میخانه سی یوخدور}

^{بیلمیر كی آدام كفله نیری ایچمه میش ایندی}

^{از بســـكی اویوب نعره-ئی مستانه سی یوخدور}

^{ایله ایتیریبدیر اوزونو خلق تاپانمیـــــر}

^{بنزیر پوزولان زولفــــولره شانه ســــــی یوخدور}

^{آنجاق نه دییم عشقه ده حسرت قالیب انسان}

^{بیر قوش كیمی كی دنله مه گه دانه سی یوخدور}

^{آختارما سخا بوردا صفا ، چونكی بو شهرین}

^{مین مســــجدی وار بیر دانا میخانه سی یوخدور}

حمیدسخامهر

گـــــئجه گؤردوم یوخودا شهر چراغــــــان اولدو

                              گـــــــؤردوگوم یــــــــئر،نظریمده یئكه میدان اولدو

گؤرمــــــه میشدیم من او میدانی باخیردیم،بیردن

                              آنامـــــــــین قامــــــتی میــــــــداندا نمایـــــان اولدو

نئــــچه ایلدن سورا گؤرسندی، ایشقلاندی گؤزوم

                              یــــــئتیشیب روحــــــو، منیم روحوما مهمان اولدو

آنامـــــــــین روحـــــــو منیم روحومولا بیرلشدی

                              ائــــــله بیل بیر دانــــــــا جسمیمده ایكی جان اولدو

چوخ سئویندیم اونو گوردوم اوره گیم چــیرپیندی

                              والـــــــه اولـــدوم، اودا گؤرچك منی  شادان اولدو

دئـــــــدیم ای گـــؤزلریمین نورو آنا! هاردایدین؟

                             غــــــم هــــــــــجرینده اینان كی اوره گیم قان اولدو

اونـــدا كی سن واریـــــدین آنلامادیم قدریوی من

                              ســــــن گئـــــــده نــــدن سورا دنیا منه زندان اولدو

ده گـــؤروم توختـامیسان، ایندی یئرین راحتدیر؟

                              دوداغــــــی قاچـــــدی باشین توولادی خندان اولدو

گــــؤزلریـن تیكدی منـــــــه حســـرتیله آه چكیب

                              پـوزولـــــوب حالــــــــــــی قهرلندی، پریشان اولدو

دئــــــــدی: من راحــــــــتم! آمما نــگرانم سنده ن

                              ســــــؤزو آغـــزیندا ،دولوب گؤزلری گیریان اولدو

آغـــــلایا - آغــــــلایا  دؤنــــدو ابــــــدیت یولونا

                             یـــــولا دوشــــــــــدو او قدر گئتدی كی پنهان اولدو

قــــیشقرانـــدا: آنـــــا گئتمـــه منی یالقیز قویـــما!

                             هـــــاراییمدان،یــــــوخودان جمـــله هـــراسان اولدو

آییلاندان سورا گؤردوم كی گئدیب یوخــدور آنام

                              وصل رؤویـــــاسی قوتولـــــدو یئنه هــــــجران الدو

قبر ائـــــوینده اؤلـــــــولرده نــگران دیر بیزده ن

                              فلــــــــكین چــرخی چونوب گؤر نئجه دوران اولدو

منــــی دؤنیاده هئچ آرواد سئوه بیلمز آنــــــا تك

                              بیـــــر دانایـــــدی آنــــام، افســوس اودا بیجان اولدو

یادینا جمـــــــــعه گؤنـــو دوشدو«سخا»نین آناسی

                             بـــــاشلاییب بو غـــــــــــزلی یازدی غزلخوان اولدو

حمید سخامهر

عمر یاصددانه ده صرف اولدو یاپیمانه ده

باشماغیم مسجدده گئتدی  هوش باشیم میخانه ده

مسجد ومیخانه دن چونكی الیم چیخدی بوشا

گولدولر احوالیما صددانه ده پیمانه ده

قالدیم آواره ایكی یول آیریمیندا نیله ئیم

استخاره ایله دیم یول وئرمه دی صددانه ده

سانماكی ایندی منم آواره سرگردان قالان

خلق اولانلار جمله سرگرداندی بو ویرانه ده

دونیادا عاقل دگیل تنها حقیقت آختاران

دوز یولون آردینجا سرگردان گزیر دیوانه ده

قالدی آنجاقكی ئوكلرده حقیقت حسرتی

حققه جاهل سهلیدیر ال تاپمادی فرزانه ده

گلدی هاردان بیر ایشیلتی گئدیك استقبالینا

اود دوتوب دوندوق كوله من ده یازیق پروانه ده

اولمادی زولف ایچره آنجاق بیرمنیم كونلوم اسیر

خرمن زولف ایچره سرگردان دولاندی شانه ده

( نیله-مك سن یاناسان من یانماسام بیزیانماساق

كعبه ده دائیم قارانلیقدا قالار بتخانه ده )

یانماسین عاشق سخا  عشق آتشینده نیله سین؟

عشق ادودوندا قاولور بیر حالداكی جانانه ده

تبریز/حمیدسخامهر