سوزگون باخیشلار آلدی الیمدن توانیمی
كیپریك اوخ اولدو، دگدی دیله تؤكدو قانیمی
سنسیز یاناردی عشق اودونا قان اولان كؤنول
سالدین بلای هجره اوجالتدین فغانیمی
ای كاش او ناز و غمزه سی جانیم آلان گؤزون
بیر گون بیلیدی دیلده كی سوز نهانیمی
آزاده شاعرم دئییلم باغلی بیر یئره
من اؤز دیلیمله خلقه یئتیررم بیانیمی
كسگین قلم له فكرین اگر اولسا سازشی
قویماز زمانه محو ائده نام و نشانیمی
من بیر گول همیشه بهارم بو عصرده
یاز گؤرموشم عؤمور بویو فصل خزانیمی
عشقین متاع محنتی جان نقدینه ساتیر
نفعی ضرر حساب ائله باغلا دكانیمی
عاشق قوجالسا سئوگیسی گؤزدن سالار اونو
یا رب قوجالتما " بارز " شیرین زبانیمی.
استاد بارز
