گونش تك سن ده  خاقانی   تك اولماق-چون  چالیش هرآن

كمان تك غمزه سی یارین   آتیبدیر  سینه-نه پیكان

آغاردی ساچ  یارین قاچدی   ئورك قالدی جاوانلیقدان

كی جان قورتارماقا اوغرو   قاچار صوبحون طولوعوندان

باشینداكی بو آغ توكلر    دئیل كینلی فلكدن قان

بو آغ توكلر كمك-چیندیر  وئریلمیش بختینه احسان

باشی واختسیز آغارتدینسا   عومور اولدی باهارستان

بو آغ توكدن كدرلنمه  اوزون عومره اودور میزان

گئجه لر  قیسا كئچمیشسه    دئمك-كی تئز سوكولموشدن

كمال اهلینه تنیله  ائدر ا رسوای  چوخ نادان

آدین دونیانی  توتموشدور  سوزونده  سیرریلر پونهان

خاقانی 

یاری گؤردوم بو گون خندان اوتورموش،

یاناغی تازه گول ریحان اوتورموش.

یوزونه قارشی غؤنچه گولدوگیچون،

سحر آغزینا چالمیش قان اوتورموش.

سنینله هوسن ایچینده بحث ائد نلر،

نئده پئشمان اولوب، حئیران اوتورموش.

سنین سیبی-زنخدانینا، ائی دوست،

نه حدیم وار دئسم، دن دان اوتورموش.

دوداغین چئوره سینده قوشا خال لر،

ایكی زنگی اونا دربان اوتورموش.

سنین لیلی جمالین گؤرمك اوچون،

یولوندا مجنونی-حئیران اوتورموش.

ختائیــــه نظر قیل چئشمین ایلن،

قاپوندا صوبحی-شام گیریان اوتورموش.

شاه اسمائیل ختائی

/ آج ایت گلمیش، توخ ایتین یانین یالیییر.

/ آج قاتیق ایستمز، یوخولو یاستیق.

/ آج قورد سورونون اورتاسینا گیرر.

/ آج تویوق یوخوسوندا داری گورر.

/ آجی دیندیرمه، توخو ترپتمه.

/ آجین قارنی دویار، گوزو دویماز.

/ آجین ایمانی اولماز، توخون آمانی.

/ آجین قورساغیندا چورك دایانماز.

/ آجین زهله سی سودان گئدر.

/ آجلیق بیر ایل گئدر، میننت مین ایل.

/ آجلیقدا داری چوریی هالوادان شیرین اولر.

/ آجلیق دان قودورانی ساخلماق اولار،

توخلوق دان قودورانی ساخلماق اولماز.

دوغرو عاشق‏سن اگر معشوق بى‏همتانى سئـو

صورته توولانما چوخ باخ لفظینه معنانــى سئـو

پرده عصمت‏ده بسلنمیش نگاره وئـر كــؤنــول

عشقوى پاك ائت‏گیلن نه هر گوزى شهلانى سئو

اول نه بیر مجنون كى سالسین چؤللره لیلا سنى

اول نه بیر وامق كى نفسه توولانیب عذرانى سئو

سوداسیز باش، بیر آغیر یوك دیر بدنده عاشقه

ال گؤتور باشدان همیشه باشدا كى سودانى سئو

دنیانین هر زادى فانى دیر گئدر قــالمــاز یقیــن

دولت جاویـده مــایلسن اگــر عقبــانــى سئــو

حققى آختار تاپ حقیقت مولكونون سلطانى اول

تاج عزت باشه قویماق ایسته‏سن مـولانــى سئـــو

هر ایكى دنیاده عــزت دیــر علــى نــوكــرلیگــى

گئت غلام شــاه مــردان اول شــه والانـــى سئــو

ایسته‏سن علمین چوخالسین سعى ائله(قرآن)اوخى

ایسته‏سن عشقین صافالسین جهد قیل طاهانى سئو

قهــرمــانلیــق درسى وئردى حق سئون انسانلارا

سئومه‏لى گونلر ایچینــده روز عاشــورانــى سئــو

سرو تك آزاده اول چك قیــر تعلــق رشتــه‏سیــن

هر نه وار آت خاطریندن شــاهــد یكتــانــى سئــو

حظ نفس اولماز هوسدن، روح ایچون بیر زاد قازان

قطره‏دن ال چك سئویرسن اى كؤنول دریانى سئــو

اینجه‏لیك‏لر چوخدى عالمــده ساییلماز بیـر بـه بیـر

هر بنا گؤردیكجــه سیــر ائت دقتــه بنــانــى سئــو

سنــده بیــر معـراج روح ائیلــه یاخینــلاش مقصده

حد قوسینه چاتاندا قرب او عــدنــانــى سئــو

آت عصانى اژدها اولسون اساس سحرى پوز

طور اخلاصه سفر قیل اورداكى موسانى سئـو

«بارز»ا درویش عشق اول نیلیسن سیم و زرى

سال اودا یاندیر هواى نفســى، استغنــانى سئو

استاد بارز

(استادیحیی شیـــدا واستادعبــاس بارز  دونیــالارینی دئیشمك حاقـقــیندا)

 

 

 

 

گونوم یامان باتیب  اولدوزوم كوسوب!

بولود قارا گئییب   آی هارا گئدیب؟

باهاریم خزاندی ! پاییزیم قیشدی

گوره سن  ایستكلی یای هارا گئدیب؟

 

ساوالان-سهندین باشیندا نه وار؟

ایندیجه گوءز یوموب  سانكی شهریار

كوءكسونو  داغلاییر  دئییر بو دیار

دنیزله  اوكیانا   تای هارا گئدیب؟

 

یئنه غم  چولقاییب آذربایجانی

 گئجه لر شعریندن سؤر "بارز" هانی ؟

"ساری كوءینك" دردین یازان شیدانی!

" نصیری " ائللره یای  هارا گئدیب

 

تبریز/ ولی نصیری

 

 

يازينين قالاني

آراز آخیر فریاد ائدیر
كوره باخمیش بالاجادیر
اما یامان هارای لیدیر
هشیرلیدیر
آراز آخیر جوشا- جوشا، داشا- داشا
قاققیلداشا- قاققیلداشا
سینه گریر گاه بو داشا، گاه او داشا

آراز آخیر نریلده یه- نریلده یه
((من ده وارام، وارام!)) دئیه
آراز آخیر، كوره چاتیر
بیرله شیرلر
بوردا ایتیر اونون آدی

سوندان سونا آخان چایا
كور دئدیلر
آراز دئیه ن هئچ اولمادی
غریبه دیر، غریبه دیر!

بختیار

باخدیم دالیسیجا یار گئدنده

بیر یولدا دئدیم باخار گئدنده

باخدی قاپیدان گئچنده گولدو

بیلمیردی اوره‌ك‌ اومار گئدنده

باغلاندی دیلیم اوره‌كدن آمما

آز قالدی چئكم هاوار گئدنده

گئتمه ، گئدیسن ؟ یاواش یاواش گئت

جانیم بیلیسن چیخار گئدنده

دوندر گؤزونو ، خومار خومار باخ

قویما منی ده ، خومار گئدنده

سن سیزلیگه دؤزمه‌گیم چتیندی

گل جانیمی آل قوتار گئدنده

سندن سورا عشقی نئیلیرم من

آل عشقینیده آپار گئدنده

مهر ایله نوازش ائیله بلكه

گول بیتسین اوره‌كده ، قار گئدنده

من گؤر نه دئییردیم اؤز اؤزمولن

قول بوینوما بیر سالار گئدنده

بیچاره اوره‌ك بولود كیمین دیر

گؤردوكجه سنی دولار گئدنده

دای « جعفری » بسدی شعر یازماق

سندنده بیر آد قالار گئدنده

كیم چئگنینه آلدی سالدی خلعت

سؤز اوستادی ، شهریار گئدنده

هوشنگ جعفری

سوروشسالار كیمم، هارالییم من

آذربایجاندانام، آذر اوغلویام

آتام قوجا قافقاز، آنام بو وطن

آذربایجاندانام، آذر اوغلویام

بوردا دده قورقود بویلاری قوردو

سالسالی، بابكب اجنبی ووردو

نظامی، فضولی، نسیمی یوردو

آذربایجاندانام، آذر اوغلویام

((اَوستا))،((خمسه سی)) عصمت چیراغی

زردتشتین وطنی مین جنت باغی

فسونكار، بهره لی هر بیر اویلاغی

آذربایجاندانام، آذر اوغلویام

نئچه اشغالچیلار باج-خراج آلدی

عصیر-عصیر یادلار الینده قالدی

هر دیاری ثروت، جاهی-جلالدی

آذربایجاندانام، آذر اوغلویام

نئچه مین داهی یه آتا-آنا دیر

قارتالی ذیروه لر خانا-خانادیر

دنیا بیر یانادیر او بیر یانادیر

آذربایجاندانام، آذر اوغلویام

هر داشی تورپاغی تختی-تاجیم دیر

هر داغی، آرانی قبله گاهیم دیر

هر اوغلو قارداشیم، قیزی باجیم دیر

آذربایجاندانام، آذر اوغلویام

مدح دیانتلی بؤیوك صنعت لی

اَیلمز وسعتلی، دؤنمز غیرتلی

ایگید-جسارتلی، شاعر-قدرتلی

آذربایجاندانام، آذر اوغلویام

طالعی تاریخی لرزه یه سالان

زال لار قیلینجینی داشلارا چالان

ارضین بهشت باغی، جنتی اولان

آذربایجاندانام، آذر اوغلویام

آزافلی عالیم لر حیراندیر اونا

ائله ائولادی وار جهان دیر اونا

یوز مین جانیم اولسا قورباندیر اونا

آذربایجاندانام، آذر اوغلویام

میكائیل آزافلی

گـــــئجه گؤردوم یوخودا شهر چراغــــــان اولدو

                              گـــــــؤردوگوم یــــــــئر،نظریمده یئكه میدان اولدو

گؤرمــــــه میشدیم من او میدانی باخیردیم،بیردن

                              آنامـــــــــین قامــــــتی میــــــــداندا نمایـــــان اولدو

نئــــچه ایلدن سورا گؤرسندی، ایشقلاندی گؤزوم

                              یــــــئتیشیب روحــــــو، منیم روحوما مهمان اولدو

آنامـــــــــین روحـــــــو منیم روحومولا بیرلشدی

                              ائــــــله بیل بیر دانــــــــا جسمیمده ایكی جان اولدو

چوخ سئویندیم اونو گوردوم اوره گیم چــیرپیندی

                              والـــــــه اولـــدوم، اودا گؤرچك منی  شادان اولدو

دئـــــــدیم ای گـــؤزلریمین نورو آنا! هاردایدین؟

                             غــــــم هــــــــــجرینده اینان كی اوره گیم قان اولدو

اونـــدا كی سن واریـــــدین آنلامادیم قدریوی من

                              ســــــن گئـــــــده نــــدن سورا دنیا منه زندان اولدو

ده گـــؤروم توختـامیسان، ایندی یئرین راحتدیر؟

                              دوداغــــــی قاچـــــدی باشین توولادی خندان اولدو

گــــؤزلریـن تیكدی منـــــــه حســـرتیله آه چكیب

                              پـوزولـــــوب حالــــــــــــی قهرلندی، پریشان اولدو

دئــــــــدی: من راحــــــــتم! آمما نــگرانم سنده ن

                              ســــــؤزو آغـــزیندا ،دولوب گؤزلری گیریان اولدو

آغـــــلایا - آغــــــلایا  دؤنــــدو ابــــــدیت یولونا

                             یـــــولا دوشــــــــــدو او قدر گئتدی كی پنهان اولدو

قــــیشقرانـــدا: آنـــــا گئتمـــه منی یالقیز قویـــما!

                             هـــــاراییمدان،یــــــوخودان جمـــله هـــراسان اولدو

آییلاندان سورا گؤردوم كی گئدیب یوخــدور آنام

                              وصل رؤویـــــاسی قوتولـــــدو یئنه هــــــجران الدو

قبر ائـــــوینده اؤلـــــــولرده نــگران دیر بیزده ن

                              فلــــــــكین چــرخی چونوب گؤر نئجه دوران اولدو

منــــی دؤنیاده هئچ آرواد سئوه بیلمز آنــــــا تك

                              بیـــــر دانایـــــدی آنــــام، افســوس اودا بیجان اولدو

یادینا جمـــــــــعه گؤنـــو دوشدو«سخا»نین آناسی

                             بـــــاشلاییب بو غـــــــــــزلی یازدی غزلخوان اولدو

حمید سخامهر