صبا منـدن سؤیله او گولعذاره

بولبول گولوستانه گلسین گلمه سین؟

                                              بو هیجران دوشگونو، ایللر خسته سی

                                              قاپیـنا درمانه گلسین گلمه سین؟

بیلدیم كی بو نازیندان بیر لحظه دایانمازسان

كونلومده اولان درده هرگیز سن اینانمازسان

معناسی نه دیر دوشسم تورپاغینا ذیلت له؟

اؤپسم ده آیاغیندان بیر حالیمه یانمازسان

سوز وئرمیشدین كامه آمما بو نه تئزلیكله

بیرعومور گئچیب گئتدی اؤز وعده نی دانمازسان

من اؤلمه لی اولسامدا، باری سن اؤزون اولدور

لاكین بیلیرم لطفون ، قانیما بولانمازسان

خاقانی نین هرده ن بیر دؤیدون قاپی سین گؤردون

قان منزلینی باسمیش،قاچدین داها آنمازسان

خاقانی اؤز عشقینده ثابیت قدم اول جان قوی

باش گئتمه سه بو یولدا وصلینی قازانمازسان

خاقانی

جانا اود ووردوم اؤزوم، پروانه لردن كوسموشم

تا كی مجنون اولموشام، دیوانه لردن كوسموشم

بیر غلط سؤزدور كی دئیرلر گنج اولور ویرانه ده

گنج یوخ، ویرانه چوخ، ویرانه لردن كوسموشم

حاصیلیم اولدو تجرددن ندامت گوشه سی

ایندی او باش آغریدان افسانه لردن كوسموشم

من ائشیتدیم، او گولون مئیخانه لردی منزیلی

اصلی یوخ گؤردوم گلیب مئیخانه لر دن كوسموشم

خانیمانیمدان منی سالدی نباتی دربه در

عقله باخ مجنون كیمی بیگانه لردن كوسموشم

نباتی

داش اوركلرده یانیب داشلاری سیندیردی موغام

حاققا دوشـمان اولانی حاققا تانیتدیردی موغام

نه گومان ائیله میسن بوندا كی طیلسیملری سن

كورو آهیله قوروتدو سالی یاندیردی موغام

سو چیلر كیمدی اوركلرده گوزل تون قالایا

نئچه قصدیم كونولی كسدی دایاندیردی موغام

دفن ائدین سیز منی زابل سه گاهین مایه سینه

دئییرم بلكه منی بیر گون اویاندیردی موغام

چوخ كیتابلاراوخودوم ظن ائله دیم بـختیارام

منه چوخ مطلبی آهیسته جه قاندیردی موغام

بـختیار

گوزلرین قاره سینـه بیر نیچه قربان دیمیشم

قاشلارین طاقینـه قربان یرینــه جان دیمیشم

راز پنهانیمی خلق ایچره منیـم فاش ایله دیـن

بی وفا، من كی سنه سریمی پنهان دیمیشم

خوبلــر جمله گدادیــر سـر كوینــده سنیـن

سنه بو خوبلــر ایچــره مـه تابان دیمیشــم

قاشینا تیغ دیدیـم قانیمی تو كمك نه ایچـون؟

توت كی، ظالیم، نولا بوباره ده بوهتان دیمیشم

اینجییوب چیخسا سینه مدن یری وار پیكانین

كی، نیچون باغریما گلدیكجه باسوب، جان، دیمیشم

واحیدم، قویمایین،ائولدوردی او مهپـاره منی

سهو ایدوب گل اوزونـه مهر درخشان دیمیشم

علی آقاواحید

جانیم نه قدر وار منه جانان سن اولارسان

جاندان دا عزیز اولسا بیر اینسان سن اولارسان

سن ایندیه دك قلبیم اوچون قلبیدین ای یار

بوندان سورادا جانیم اوچون جان سن اولارسان

هریاره م اگر اولسا اونون مرهمی سن سن

هر دردیم اولارسا اونا درمان سن اولارسان

كونلون نئجه ایسترسه ائیله ورمنه فرمان

عومروم نه قدر وار منه سولطان سن اولارسان

ائیلرسم اگر شرحینی ایمانیله كوفرون

باش حرفیله سر لوحه ی دیوان سن اولارسان

بوندان بئله آلداتما منی كوفریله دین له

خاقانیه هم كوفر وهم ایمان سن اولارسان

خاقانی نه دیرگلسن اگر ای گوزو شهلا

البته كی خاقانیه خاقان سن اولارسان

خاقانی

سنین بهرن ییه ن كیمدیر؟
كیمینكی سن؟ ییه ­ن كیمدیر؟
سنه دوغرو دیه ن كیمدیر؟
یالان دونیا، یالان دونیا!

سنی فرزانه لر آتدی
قاپیب، دیوانه لر توتدی
كیمی آلدی، كیمی ساتدی
ساتان دونیا، آلان دونیا

آتی ازل داغا سالدیق
یورولدوقجا دالی قالدیق
آتی ساتدیق، اولاغ آلدیق
یهر اولدی پالان دونیا

بیری آینا ، بیری پاس دیر
بیری آیدین، بیری كاس دیر
گجه توی دور، گونوز یاس دیر
گول آچدیقجا، سولان دونیا

ایگیت ارین باشین یئیه­ن
گوجالار بوزباشین یئیه­ن
قبیرلرین داشین یئیه­ن
اءوزو یئنه قالان دونیا!

نه قاندین، كیم گول اكن دیر؟
كیم قیلیج تك قان توكن دیر؟
تیمور هله كوره كن دیر
چنگیز جانین، آلان دونیا

یامان قورقو! ییغیلایدین!
طوفانلاردا بوغولایدین!
نه اولایدی بیر داغیلایدین
بیزی درده سالان دنیا

چاتیب، سندن كوءچن كچدی
اجل جامین، ایچن كچدی
اولان اولدو، كئچن كئچدی
نه ایستردین اولان دونیا

بوغولایدین، دوغان یئرده
دوغوب خلقی بوغان یئرده
اوغول نعشین اوغان یئرده
آنا زولفون یولان دونیا 

           شهـریار

ای ملك سیما كه سندن ئوزگه حیراندر سنه

حق بیلیر انسان دئمه ز هر كیم كه انساندر سنه



وئرمییه ن جانین سنه بیلمه ز حیات جاویدان

 زنده و جاوید اونا دئرلر كه قرباندر سنه



عالمی پروانه شمع جمالین قیلدی عشق

جان عالمسن فدا هر لحظه مین جاندرسنه



عاشقه شوقینله جان وئرمك ایكن مشكل دگیل

 چون مسیحی وقتسن جان وئرمك آساندر سنه



چخسا یاریم گئجه لر اغیار طعنیندن ساقیا

 سن مهی اوج ملاحتسن بو نقصاندر سنه



پادشاهیم ظلم ائدیپ عاشق سنه ظالم دئمیش

 خوبرو لردن یامان گلمه ز بو بهتاندر سنه



ای فضولی خوبرو لردن تغافلدر یامان

 گر جفا هم گلسه اونلاردان بیر احساندر سنه

فضولی

اگر قویسان باخام من بیر نظر اول چشم شهلایه،

گؤزوم چیخسین اگر من بیر ده باخسام جام مینایه

جانیمی یاندیردی شوقون ای نگاریم هارداسان
گوزلریم نوری ایكی عالمده یاریم هارداسان
باغریمی قان ایلدی آجی فراقون گل ایرش
ای لبون وصلی شراب خوشگواریم هارداسان
فرقتون دردی منی گور كی نه مجروح ایله دی
ای گوزی نرگس حبیب گولعذاریم هارداسان
صبری یغمالدی شوقون قراریم قالمادی
ای منیم آرام صبریم بی قراریم هارداسان
ایله دی عشقون منی قلخان ملك تیرینه
ای گوزی قاشی بیلیك لی شهریاریم هارداسان
تا اوزون شوقوندان ایراغ اولموشام پروانه تك
یانیرام لیل و نهار ای نور و ناریم هارداسان
قاتی موشتاق اولموشام زلف و غذارین بویونا
ای اوزی گلشن ساچی مشك تاتاریم هارداسان
سندن آیری كونلومه یوخدور وفالی یار دوست
ای جفاسیز حسن كامل یار غاریم هارداسان
هجرون اوخی دلدی بو شوقونده یانان باغریمی
صورت و معنیده ای چابك سواریم هارداسان
بادایلن گوندر ساچین بویین منه هر صبحدم
ای كی یاندیم گئچدی حددن انتظاریم هارداسان
یار اوچون هر گوشه ده مین دیو اولور دشمن منه
ای سواد اعظم و محكم حصاریم هارداسان
عاشیقین جنات عدنی چون جمالون وصلیدیر
ای شراب كوثریم گئتمز خماریم هارداسان
چون نسیمی دور بوگون ایام عشقین خسروی
ای شكر لــب یار شیرین روزگاریم هارداسان

نسیمی