باشدان ایشلر ترسه  گلدی، گولمه، گولمكدن كئچیب 

چوخ یامان بیر درده دوشـــدوك دردی بیلمكدن كئچیب

     باغ پوزولدو كند داغیلدی اؤلدو بولبول سولدو گول

     شاختا چالدی باغلارین بارین، دریلمیكدن كئچیب 

بو جهالت بیر مرضـــدی كیمسه دوتدور فاتحـــــه

 دور قبیر قازدیر كفن بیــــــچدیر دیریلمكدن كئچیب

اختیار سیز عمرومون فرشین دار اوستن داره چك

 قین جیلان آرخاجدان ایلمك چالما، ایلمكدن كئچیب   

اؤز دیلیمدن آسلانیر باشیم، باشیمدان قورخمورام

فیكریمی برك ساخلایین، بوینوم اوزولمكدن كئچیب 

جان سیزین، جان  تبریزین، جان تورك لرین گویچك دیلی

قوی سؤزوم دیللرده قالسین، دیل بیچیلمكدن كئچیب 

آی هاوار باغریم یاریلدی قوللاریمدان ساخلایین

 قویمایین قلبیم سیخیلسین قد كیچیلمك دن كئچیب

هوشنگ جعفری

هر گـول آچیلا، اول گولی-رعنا كیمی اولماز،
هر عاشق اولان بولبولی-شیدا كیمی اولماز!

مـــین لرجه بو دونـــــــــیایا گؤزللر گله بیرده،
من سئودییم اول شوخی-دل آرا كیمی اولماز!

گولدن او تمنّانی كی،بولبول قیلیر هردن،
مین باشقا تمنّا بو تمــــــنّا كیمی اولماز!

فخر ائتمه سین اؤز سئودییی لئیلاسینا مجنون،
مین لیـــــــلی اگر گلسه،بو لـــیلا كیمی اولماز!

واحــید،دئمه كی،عطریلی گوللر یئتیشیبدیر
هر عطر گلیب عنبری-سارا كیمی اولماز!

علی آقاواحید

گؤرسن من نییه یارب بئله نالان اولدوم ؟

غلط ائدیم كی سنه واله و حئیران اولدوم!

 اودا یاخدین من بیچاره نی پروانه كیمی

آجیغین گلدی مگر عاشیق انسان اولدوم ؟

 سود و سرمایه می مجموع الیمدن آلدین

نییه كیم زاهد اولوب مسجیده دربان اولدوم !

شیخ صنعان كیمی من بوینوما سالدیم زنار

ایندی گل گؤر كی كیلیسالارا رهبان اولدوم

  ائتدیم اول دیلبر ترسایا بو گون بیر سجده

ایندی بیلدیم كی یقین منده مسلمان اولدوم

 شكر الله كی من كوفرده بولدوم ایمان

كئچن ایامه نه حاصیل كی پشیمان اولدوم

 گل نباتی، دولانیم باشینا، به!به! نه گؤزل

جان وئریب یاره، وفا راهینا قوربان اولدوم

سیدابوالقاسم نباتی

فرقتوندن یاندی باغریم اوره گیم قان اولدی گل

گل كی رخسارون بو مرده جسمه جان اولدی گل

دونیانین ناز و نعیمی، باغ و بستانی منه

سنسیز ای سولطان خوبان بند و زندان اولدی گل

ایستدی لعلین فراقی جانیمی یاخماق ولی

شوقه یانمیش جانه لعلین آب حیوان اولدی گل

اول كونول كی دایمن ایشی سنونله وصل ایدی

یاندی شوقوندان اسیر درد هجران اولدی گل

جانیمین جانی وصالیندور وصالوندان اونی

تا كی اییردی فلك بیچاره بیجان اولدی گل

عاشقین باغ و گولستانی اوزون گلزاریدیر

هانسی گولزارین گولی گول سوز گولیستان اولدی گل

جنتین صحنینده طوبی واله و حیران و مست

قامتون حسنونده ای سرو خرامان اولدی گل

تا منی تقدیر یزدان ایله دی سندن جدا

كونلومون حالی پریشان دیده گریان اولدی گل

معجزاتوندان یاناغون، محكماتوندان ساچون

خار و خاشاكی جهانین ورد و ریحان اولدی گل

بحر بی پایانه شوقون جانیمی غرق ایله دی

گؤر نه بیداد ایله دی هجرون نه طوفان اولدی گل

بو نسیمی سندن آیری بیلدیگیم یوخدور وجود

درد و درمان، وصل و هجران، جمله یكسان اولدی گل

نسیمی

شفای وصل قدرین ، هجردن بیمار اولاندان سور

زلال ذوق شوقون ، تشنه دیدار اولاندان سور

لبین سرین گلیب گفتاره ، من دن اؤزگه دن سورما

بو پنهان نكته نی بیر واقف اسرار اولاندان سور

گؤزو یاشلی لارین حالین ، نه بیلسین مردم غافل ؟

كواكب سرینی ، شب تا سحر بیدار اولاندان سور

خبرسیز اولما فتّان گؤزلرین قیدین چكن لردن

خبرسیز مست لر بیدادینی ، هشیار اولاندان سور

غمین دن شـمع تك یاندیم،صبادان سورما احوالیم

بو احوالی شب هجران ، منیم له یار اولاندان سور

خراب جام عشقم ، نرگس مستین بیلیر حالیم

خرابات اهلینین احوالینی ،خـمار اولاندان سور

مـحبت  لذتین دن  بی خبر دیر زاهد  غافل

فضولی، عشق ذوقون، ذوق عشقی وار اولاندان سور

فضولی

مهربانلیق گورمه ییب بیر مه لقادن كوسموشم

گونده یوز آل ائیله ین قلبی قارادان كوسموشم

شأنینه دئدیم شیرین سوز، بیر شی اوندان دادمادیم

بو سببدن آغزی شكر دلربادان كوسموشم

بیر قدح می ایسته دیم، سیندیردی كونلوم شیشه سین

داش باغریلی ساقی صاحب جفادان كوسموشم

چون اومان یئردن كوسرلر بیر مثل دیر خلق آراسیندا

كوسدوگیم بیجا دگیل دیر آشنادان كوسموشم

گوردوم اول كه، بناسین یارلیق ائتمگ دگیل

واقفا، اصلی بودیر من بو بنادان كوسموشم

ملاپناه واقف

دوشنده طره ی دیلبر خیاله آخشاملار

محبّت اهلی باتار مین ملاله آخشاملار

شكسته بولبوله بنزه‌ر بلا چكن عاشیق

گولوندن اؤتری ائدر آه و ناله آخشاملار

گونوزلر عاشیقه طعن ائتمه كی، گولوب دانیشیر

سالار فراقین، اونی گور نه حاله، آخشاملار

دوشه‌نده زولفون اوزه، قاشلارین خیاله دوشر

باتاندا گون، باخار عالم هیلاله آخشاملار

شرابی یارسیز ایچسه‌ن بیر آزدا غم گتیره‌ر

گول اوزلی یار ایله اول هم‌پیاله آخشاملار

بیر اؤزگه لذّتی وار، عاشیق‌ایله معشوقه

رقیب‌سیز اولا محرم وصاله آخشاملار

میسّر اولماسا گوندوز سنه شراب ایچمك

اوُنوتما، واحید، اونی لامحاله آخشاملار!

علی آقاواحید

سن منه دلبر یئترسن اوزگه‌لر یار اولماسون

بیر اولور یار ایكی اولماز، ایكی زنهار اولماسون

باغریمی دوغرار فراقین خاری، ای جنّت گولی

نوبهار اولسون، گول اولسون، آرادا خار اولماسون

ای سكز جنات عدنین باغ و بستانی یوزون

گولدن آنین گلشنی بی برگ و بی بار اولماسون

كیمكه دیداریندن اوزگه نسنه ایستر، یادیلر

یئتمسون حقدن نصیبی، اهل دیدار اولماسون

فرقتین دردی منی بی‌خواب و گریان ائیلدی

دشمنین عمری دوكنسون بختی بیدار اولماسون

توتموشام عشقینله پیمان، قیلمیشام حسنونله عهد

آندن اوزگه عهد و پیمان، قول و اقرار اولماسون

یاپیجی حقدیر، خرابی اول یاپار معمور ائدر

حق یاپان معموره آیروغ كیمسه معمار اولماسون

زلفونون داریندا، شاها، آسیلان منصور ایدی

هر كه منصور اولمادی، زولفونده بر دار اولماسون

اولموشام عینین كیبی بیمار، عشقیندن جدا

یارب او نرگسدن اوزگه كیمسه بیمار اولماسون

ای نسیمی، قیلما یارین سرّینی اغیاره فاش

تا كه یار اولسون بو سرّه محرم، اغیار اولماسون

نسیمی

غم دیاریندا اجـــل پــــیكی گــذر ائتمز مـنه !

یوخ سانیب واریم مگر كی اعتبار ائتمز منه؟

یار جور ائتمز منه اغیار تعلیم ائتمه ‌دن

بالله اغیار ائیلین احسانی یار ائتمز منه!

داغیدیر هر لحظه برگ عیشــــیمی آهیم یئلی

هانسی ناحق ظلم ‌دور كی روزگار ائتمز منه؟

عشق دردیله خوشام، ترك نصیحت قیل رفیق

من كی تریاكی مزاجم، زهر، كار ائتمز منه

چرخیـــــدن آشیرمادان یادینلا آه آتشـــــــــــین

قدر ائدیب گردون، شرردن زر نثار ائتمز منه

نقد جان تاراج غمدن ساخلاماق دشوار دیر

عشق تا سنگ ملامتدن حصار ائتمز منه

یاد لعلینله فضـــــولی گؤزله ‌ییب راه عدم

وار بیر تدبیری، اما آشــــــكار ائتمز منه

فضـــــولی

عاشق باغرینا باس صدفلی سازی

مین جوابلی بیر سئوالدان دانیشاق

میدان قوراق، صحبت آچاق، ساز توتاق،

گل یاناقلی، قوشاخالدان دانیشاق

قوی سوز آلیم بیر گناهسیز دوداقدان

دشمن باخیب حسد چكسین اوزاقدان

یار بزه نیب چخان زمان اوطاقدان

یاشینداكی گللی شالدان دانیشاق

وورغون دئیه ر، بیر دردبیلن یار اولسون

زلفی بولوت، آغ سینه سی قار اولسون

یاخشی گونده، یامان گونده وار اولسون

قدر بیلن احل حالدان دانیشاق

صمدوورغون