ساقیا! بیر بو ده‌گیل نشئه‌سی پیمانه میزین
هله بوندان سورادیر لذّتی میخانه میزین

بیز گرك باده‌ی گل‌گونی حكیمانه ایچك
پوزمایاق رؤنقینی مجلیسِ مستانه میزین

آیاغین اؤپمه‌لییك خادمِ میخانه‌لرین
بلكه، جام ایچره گؤره‌ك عكسینی جانانه میزین

زولف شؤقیله اولاق مست، بوتون عاقیل‌لر
قالسین ادراكینه حئیران دلِ دیوانه میزین

بیز همان رندِ خراباتیِ بی‌باك‌لریك
صحبتی ایندی‌ده دیل‌لرده‌دیر افسانه میزین

درد الیندن بوقدر چكدیگیمز ناله‌لره
نه گلیر یاریمیزن رحمی، نه بیگانه میزین

عشق زنجیرینه واحیدده گرفتار اولدو
آزدی گویا، بیری‌ده آرتدی بو دیوانه میزین

علی آقا واحید

دامه دوشمیش صیدتك صیادی گوزلر گوزلریم

یوخسه دیرسیز زاهدم من اولموشام خلوت‌نشین

اول صنمدن اوتری بو بربادی گوزلر گوزلریم

بیستون داغین گیدوب گزمك دگل منظورمیز

نقش شیرین تك همان فرهادی گوزلر گوزلریم

تا ائدوب عكس جمالین سینه‌می لوح خیال

ششدر حیرتده بیرنرّادی گوزلر گوزلریم

برق عشقین آتش سوزانه یاخمیش باغرمی

یاش توكنده دجله‌ی بغدادی گوزلر گوزلریم

مكتب عشق ایچره تا اتسون منی كامل عیار

اولموشام پا بسته بیراستادی گوزلر گوزلریم

قویمیم تا اوندان اوزگه كیمسه بو ویرانه‌ده

روز و شب بو خاطر ناشادی گوزلر گوزلریم

پرتو مهر روخوندن تاكی بیلسون بیر نشان

هر طرف سیران ائدوب هریانی گوزلر گوزلریم

جمله ی قرآن كتابی ائیله مكدن الورق

اوزگه مطلب یوخ همین بیر آدی گوزلر گوزلریم

محمل لیلی  نباتی  گوزدن اولدو ناپدید

من نه مجنونم كی بو اوتادی گوزلر گوزلریم

سیدابوالقاسم نباتی

ائوده بیر ایل آه چكرم خبر یوخ
ائودن چیخام من او یانا یار گلیر

تای توشلاریم چوله چیخا گون چیخار
من چیخاندا یاغیش گئدسه قار گلیر

یازیق گوزوم آجلیغا دوز داریخما
بوگون سحر باهار گلیر بار گلیر

بیزه گله گلمیه بیر كال ایده
قونشوموزا هیوا گلیر نار گلیر

خان ائوینه شیر گله قویروق بولار
بیزم ائوه كور ایت گلیر هار گلیر

خلقه قوناق گلیر گؤزو سورمه لی
بیزیم ائودن كور گئتمه میش كار گلیر

بختیمه آرواد نه چیخا بیلمیرم
بللیدیر كی سار ساغا سوسار گلیر

بیر اوج اتك اندازادی اگنیمه
سالیس بوری گن گلمه سه دار گلیر

دولتیه یاس دا گله اوینایار
بیز كاسیبا توی گله آخسار گلیر

غم یوكونن كد خدا نین هیس سسی
خردل اولور بیزیم كی خالوار گلیر

كده بیزی دویلله بیر هاوار یوخ
بیز بیر كلمه حق دانیشاق جار گلیر

دارقا شایید لار بیزه سركار چیخار
دار دیبینن قورتولا سردار گلیر

بوندان بئله اؤزگه گورم اؤزگه دن
میننت چكیر غیرتمه عار گلیر

ایشجی تویق كسنده من باخاممام
بیلمم نئجه اؤرگینن وار گلیر

غم دن منیم بیر عینك وار گوزومده
ایشیق آیدین گون گوزومه تار گلیر

عشقیم دوشوب یادیما گوزلر داشیر
باهاردا سئل آتلانا چایلار گلیر

چوخ شاعیرین طبعی دونار بوز كیمی
شهریار ین شعریده قاینار گلیر

شهریار

سن اولماسان، گؤزه لیم، گولستانه باخمازایدیم
چمن چیچك لرینه عاشیقانـه بـاخمـاز ایـدیـم

اسیـر زولفـون ا گـر اولمـاسـایـدیـم عـالمــده
جمالینـا بـو قـدر عـاجیـزانـه بـاخمـاز ایـدیـم

منیملـه اولسـاایـدیـن بیـر دقیقـه عـؤمـرومــده
جهان بوتون گؤزه ل اولسا، جهانه باخمازایدیـم

منی فراقین اودی یاخمـاسـایـدی شمـع كیمـی
گؤرنده گول اوزونو، یانه ـ یـانـه بـاخمـازایـدیـم

فـراقینـا دؤزه بیلسـه ایـدی قـان اولان كـؤنلــوم
یولوندا چكدیگیم آه و فغانـه بـاخمـازایـدیـم

او گول جمالینا من عاشیق اولماسـایـدیـم ا گـر
فغانِ بولبوله چـوخ محـرمـانـه بـاخمـازایـدیـم

                                   منی غرق ائله دین غم دریاسینا

                              ای چشم خماریم، نئچون آغلادین؟

                              ای گوزوم، نه دگیب كوكرك كونلونه؟

                              ای شیرین گفتاریم، نئچون آغلادین؟

                              گردنینده زلفون تر سنبل كیمی

                              سونادان اوزولموش قارا تئل كیمی

                              سن گرك گوله سن قیزیل گول كیمی

                              ای لاله رخساریم، نئچون آغلادین؟

                              اولمایا سن منی بی اقرار ساندین

                              ظرافت ائله دیم، اونا ایناندیم

                             نه دگدی كونلونه، نه دن بولاندین

                             دیشلری مرواریم، نئچون آغلادین؟

                             باغریم باشین شان- شان ائله دین، دلدین

                             دونوم گوزلرینه، آز آغلا، اولدون

                             دئیه ردین، گولردین، بئله دئییلدین

                             منیم جادوگریم، نئچون آغلادین؟

                             هر كس گورن دمده اوز سیرداشینی

                             مگر توكر قاباغینی، قاشینی؟

                             اودا یاخدین جگریمین باشینی

                             واقف دئییر: دلداریم، نئچون آغلادین؟

ملاپناه واقف

نامرد چوءرگیندن بیر تیكه یئسن

باشینا چالینان منته دئیمز

وفاسی اولمازا ها خیدمت ائیله

یولوندا چكدیگین زحمته دئیمز

بزه ك لر وئره سن چول تیكانینا

اوجو دئیسه اگر بشر جانینا

بونی بیل كی یقین بویار قانینا

سن اونا وئردیگین زینته دئیمز

نا نجیب زاده ایله اولاسان هاماش

محبت ائده سن ساناسان قارداش

خصلتی دگیشمز قانماز او كول باش

اونا بس ائتدیگین حوءرمته دئیمز

" نصیری " سوءزونو  یادا سال هرآن

آنلاماز اینسانی قویار سرگردان

سحردن آخشاما دانیشسا نادان

بیر كلمه ثمرلی صحبته دئیمز

تبریز/ ولی نصیری

كونول وفاسیز اولان نازلی یاره یالوارما
نه اعتبار اونا بی اعتباره یالوارما

داریخما یاخشی ، یامان روزگار یمیز گئچه جك
بو بئش گون عومره گؤره روزگاره یالوارما

سنین ده بیرگون اولار نوباهارین ای بولبول
خزان جفاسینه صبر ایله رخساره یالوارما

فقیره عاجزه مظلومه احترام ائیله
عدویه ، قان ایچه نه ظلمكاره یالوارما

وطن یولوندا اؤلوم مرد اوچون سعادت دیر
حیات اوچون فلك كج مداره یالوارما

مخالف اهلینه باش اگمه سن ده منصور اول
اناالحق اوسته چكیلسن ده داره یالوارما

محبت اهلینه "واحید" همیشه خدمت ائیله
نه تاجداره نه بیر شهریاره یالوارما

علی آقاواحید

 یوز سرو خورامان اولا كونلوم سنی ایستر

    یوز باغ و گلستان اولا كونلوم سنی ایستر

یوز زهره تكین ماه لیقا مهر دل آرا

     یوز مین مه تابان اولا كونلوم سنی ایستر

 بو ظلمت زولفونده لبین آب بقادیر

   یوز چشمه ی حیوان اولا كونلوم سنی ایستر 

ای خوبلارین شاهی كونولدور سنه طالیب

      عالم هامی خوبان اولا كونلوم سنی ایستر

ای دوست بیزه حوری و قیلمان نه گرك دیر

      یوز حوری و قیلمان اولا كونلوم سنی ایستر

سید ! دئگیلن بند اولام هر بیر گوله آلا

      یوز غنچه ی خندان اولا كونلوم سنی ایستر

سیدعظیم شیروانی

ای قامتی شومشاد، بویو سرو سنوبر،
ای شوخ سیتمگر!
آیا گؤره سن وار بو جاهان ایچره سراسر،
بیر گول سنه بنزر؟
گؤرجك سنی من، ای اوزو گول، طره سی سونبول،
ال هامیدان اوزدوم.
گر حور و پری روی زمینی توتا یكسر،
كؤنلوم سنی ایستر.
اول دم كی، سنین مهر روخون ائتدی تجلل،
عشق اولدو هووئیدا.
اوّل من ایدیم جان ائدن اول آتشه مجمر،
مندن سورا آذر.
سندن یئتیشیب خیضر- نبی سرّ نیهانه،
اولدو منه ثابت.
بیللاه، سن ایدین نازیل آیات پئیمبر،
جیبریله مصور.
آلمیش الینه مشعل خورشیدی مسیحا،
گردیشده دی دایم.
هر دم چاغیریر صیدق ایله، یا ساقی كوثر،
یا خواجۀ قنبر.
موسی كیم ایدی گؤستره خلقه ید بیضا،
ای شاهید غئیبی؟
“هو-هو” دئگینن ظاهر و باطینده مقرر،
ای ریند قلندر.
قورخوم بودور اما كی، اگر ساقیی گولرنگ،
دؤور ائتسه مسلسل،
عاریف لرین احوالین ائدن عالمه ازهر،
اول بادۀ احمر.
منصور-صیفت شام و صبا ذكر ”انالحق”
اولموش منه عادت.
معلوم كی، یازماز قلم خالیق اكبر
بیر امری مكرر.
قاچماق گرك آهسته بو میدان بلادن،
بیر كنج نیهانه.
بو عرصه ده باش قویدو بسا مرد دیلاور،
چوخ صاحب افسر.
گؤر عشقی كی، غوواص بو حار اولدو نباتی،
بی فن سباحت.
دریالری سئیر ائیله دی بیر لحظه ده یكسر،
بی هادی و رهبر.

سیدابوالقاسم نباتی