اینسان اولان پیسه یاخشی سویله مز

چكیلسه ده دارا ائل آراسیندا

پالید كیمی كولك قارشیندا دورار

قایا تك دایانار سئل آراسیندا

یایای دوز گََُونلویو دوغما ائلینده

حقٌه آرخا اولار دوز سوز دیلینده

ایگید بابك كیمی شـمشیر الینده

های سالار موغانلا میل آراسیندا

ایشیق ساچار یوردا بیر اوجاغ كیمی

سو وئرر سوسوزا بیر بولاق كیمی

یارار سینه سینی بیر داراق كیمی

چاتا یارا قالا تئل آراسیندا

ایلانلار گوزونه اودلار سالـماغا

دونیا بویو آدی دیری قالـماغا

یازیق كوتله لرین حقٌین آلـماغا

قالـخار داغا یاشار بئل آراسیندا

قیزیل قفس ، اوچار قوشا زینداندی

قفسده بولبولون اورگی قاندی

آجی آغریسینا شیرین درماندی

سانـجیلا تیكاننا گول آراسیندا

ال اوزر جانیندان سوز وئرمز یادا

اینسانلیغی ساتـماز شوهرته آدا

 سیــد  كیمی اودا داغلی دونیادا

چاغیرار آزادلیق ائل آراسیندا

سیدعظیم شیروانی 

هر عاشق اولان عشقه گرفتار اولابیلمز

هـــر خورما ساتان میــثم تمار اولابیلمز

مخـلوق خداوند اوزونه اولمیان عاشیق

حــق عاشقه تك صاحب ایثار اولابیلمز

دونیـــا مالینا شـهرتینه وورقون اولانلار

ایــنفاق ایله مز  طالب دیدار اولابیلمز

ماءموره اگررشوه یماخ اولماسا عادت

مظلوملارین قانینی ظالیم سورا بیلمز

مــــیمون تكین هر سوزه تقلید ایلینلر

اندیشـــــه ادیب صاحب افكار اولابیلمز

صابر یمه غم هر گونین ئوز قصه سه واردیر

مفــــــراق پاراسی گوهر شهوار اولابیلمز

صـــــــابر

ای خسته قوش آواره گزیرسن بو دیاری

زنداندی قفسدی چمنی،باغی،باهاری

گوزله اوزووی اوچی دی هریانی بو یوردون

قوزغون كیمی دورت گوزلو گزیر كورپه شكاری

فرصت دالی سینجا گزیر ال یئری تاپسا

ویران قویاجاق یوردونی ای كوینكی ساری

تیك اوز یووانی قویما سنه ال تاپا اوچی

سن بو یووانئن صاحیبی سن،قان یئنه باری

جهد ائیله كی،جان قورتاراسان اوچی الیندن

دوشسن تورا،فریاد ائلمه،چك بو فشاری

گولشنده كی یوخ ذوق وصفا ای ساری كوینك

قاچ قاچ بو یئرین زهرلی دیر دارو نداری

دیللنسن اگر،اوچی ائده ر قانئنا غلتان

اوچسان آ یازئق!تیر جفا قلبینی یاری

مین فئرتانا قالخئب،دوگه جك،باشئنا طوفان

هر كیمده اولا،داغ كیمی دونیادا ووقاری

گلسه نه قده ر دردو بلا ،داغ كیمی دور باخ

ایدین دی بو سوز"توستو گئده ر گوچكه ساری"

ایستر سنی صیاد اوزونه رام ائده امما

اویغودا گوره ر،اج تویوق البتده كی داری

بو یاخشی مثل دیر كی بیزیم ائلده دئمیشلر:

بیر باخ اشاغا ،باخما اوزونده ن ده یوخاری

غم غصه كیچیك قلبینی گر دوگسه سئخئلما

بو گونده كئچر،اخیری،غملرده قوتاری

اوندا كی چئخارگون،یاییلار عالمه بیرده ن

اوندا كی قارادان یئری ،صبح اولجاق اغاری

داغی-داشی اسوده خیالیله گزه رسن

گولشنده نه شاختا گوره سن،داغدا نه قاری

ظولمون ائوی ویران اولو ،ظالیم دوشه ر الدن

قان دورماز اگر كسسه پئچاق قئرسا داماری

بختین قاپوسی ایندی قئفئلانسا دارئخما!

هر بیر قئفئلئن واردی طبیعتده اچاری

اوز جانوویلن اویناما بو عرصه ده "شیدا"

لیلاج دغلبازیله قئزدئر ما قوماری

یحیی شیدا

هر در دینه قالان كسده درمان اولا چتیندی

هر اوخویان عالیم اولان ، لقمان اولان چتیندی

هر ایاق اوسته یئرییه ن انسان اولا چتیندی

بو دونیا نین قوجاغیندا ، جسدده وار ، جان دا وار

دوغرو یولدا گزسن اگر شهرت ده وار ، شان دا  وار

دوغـــــرو یولدان آزسان اگر ، قادا دا وار ، قان دا وار

آتالار گـــــوزه ل دئییب كی ، حاق نزیله ر اوزوامه ز

گئج ائیلییه ر،گوج ائیلییه ر حاق دا وار ، دیوان دا وار

وطن اوغلو  خوش سوزلره خوش اویاجاق دونیادا

گاه سئوینجی ، گاه كده ری داشییاجاق دونیادا

نقده ر كی بنی انسان یاشییاجاق دونیادا

ناداندا وار ، قانان دا وار ، گدا دا وار ، خان دا وار

بهمن وطن اوغلی

انتظار اهلی دیور دونیا گلستان اولا جا خ

اءسه جاخ باد صبا عازم بستان اولا جاخ

شورلن شدت لن قاینیه جاخ حق بولاغی

باغ وبستان گل آچیپ دامنی الوان اولا جاخ

گتریب مژده صبا یوسف دوران گله جاخ

سور وساطیله گایب وارد تهران اولا جاخ

سالاجاخ زلزله بو شهره بوتون ترپده جاخ

یخلیب كاخ ستم خاكیله یكسان اولاجاخ

گنه حلاج زمانه دوشه جاخ عشق اودونا

هی انا الحق چاغرییب منجی انسان اولاجاخ

گنه شمشیر عدالت دوشه جاخ حق النه

آتش قهر خدا اوندا نمایان اولا جاخ

وعده ی حق ده ضعیف لر آلاجاخ یر اوزونی

اقویا قالسا دا بیر گوشه ده پنهان اولاجاخ

یخیلب بت كده بت لر هامی بیردن سیناجاخ

ابراهیمین بالاسی صاحب فرمان اولاجاخ

آرزوم واردی گورم ظلم اوینین یانما سینین

ظالم آخرده گورم ظلمنه قوربان اولاجاخ

صــــــــــابر

بیر نفر اهل وفا مین بیوفادن یاخشیدر

بیر صداقت اهلی مین اهل ریادن یاخشیدر

 هانسی گولدور حسنده سندن گوزلیدر،سوگیلیم؟

 هانسی بلبل عشقده من بینوادن یاخشیدر؟
 
 قاشلارین چرخین هلالیندن ،اوزین خورشیددن

صورتین آیینه گیتی نمادن یاخشیدر 
  
 بیرداها خالین گوزه للیك آرتیریر روخسارینه

 بیر غلط سوزدور دئمشیلر ،آغ قارادان یاخشیدر 
 
  گوزلرین صحرای چین آهولریندن دیلفریب

عنبرین گیسولرین مشك خطادن یاخشیدر
 
 صحتی بیمار ،عشقین كعبهء كوینده دیر

 اهل درده خاك راهین توتیادن یاخشیدر
 
 مین بلا طوفان قوپسا ،ذره گلمه ز عینیمه

رخنه گورمز هربنا كیم ابتدادن یاخشیدر
 
 جاهله تبلیغ عرفان ایله ملك آسان دگیل

دیدهء خفاش ایچون ظلمت ضیادن یاخشیدر
 
  واحید،انصافأ دئسین تبریز ده دوستوم اعتماد

 گنجلرده هانسی شاعر بیر یادن یاخشیدر

علی آقا واحید

ای شوخ یئنه همدم اولوب كاكله زولفون
تحریض ائدیر اول كافری صید دله زولفون

دین و دلیمی غارت ائدیب ائیلمز انصاف
شیمدی نه تمنا ایله ائیلر گله زولفون؟

هـــــر لحظه اورور سینه مه مین ناوك دلــــــدوز
مژگانین ایله یوخسا ده ییب دیل – دیله زولفون؟

حیـــــــرتده یم، آیا كی، نه دیر فتـــنۀ  "هاروت"
ای شوخ، مگر سئحر اوخویوب  "بابل"ه زولفون؟

تنها سفر ائتـــــمه، گل آپار جانیمی، اما
بو سری نهان ساخلا، مبادا بیله زولفون

آلـــداتدی كؤنول مرغنو اول دانۀ خالین
دام ره عقل اولدو او پر سلسله زولفون

صابر كیمی غرق اولدو گؤزوم یاشینه جسمیم
دوتمــــــوب الیمی چكمدی بیر ساحله زولفون

صــــــــابر

    

ای ناوك شوقین سپر سینه-ئی احباب،
زلفون خـمی ارباب وفا قیدینه قلاب!

             

ال چاتسا فدا جانیمی جانانه ائدردیم
شمع روخونه كؤنلومو پروانه ائدردیم

ای زاهد بی ذوق بو مسجید كی، سنین وار
اولسایدی منیم، من اونو میخانه ائدردیم

مینبر عوضی اوندا قویاردیم خوم باده
وقف اول خوم اوچون بیر نئچه پیمانه ائدردیم

بیر تاره دوزردیم نئچه یوز دانۀ انگور
آنی عوض صبحۀ صد دانه ائدردیم

مئی دن اؤتورو اكمك اوچون تاك یئرینده
هر یئرده كی، وار مدره سه ویرانه ائدردیم

دوشسیدی نهانی الیمه بچّۀ زاهد
هئچ اوندا بیلیرسنمی كی، آیا، نه ائدردیم

سیّد تك ائدیب وصف پری لر خط و خالین
بو وضع ایله عالم لری دیوانه ائدردیم

سیدعظیم شیروانی

منده سیغار ایكی جاهان، من بو جاهانه سیغمازام
گؤوهری لامكان منم، كؤونو مكانه سیغمازام

عرشله فرش و كافو نون منده بولوندو جومله چون
كس سؤزونو و ابسم اول، شرح و بیانه سیغمازام

كؤونو مكاندیر آیتیم، ذاتی دورور بیدایتیم
سن بو نیشانلا بیل منی، بیل كی، نیشانه سیغمازام

كیمسه گومانه ظن ایله اولمادی حق ایله بیلیش
حققی بیلن بیلیر كی، من ظنّو گومانه سیغمازام

صورته باخ و معنینی صورت ایچینده تانی كیم
جیسم ایله جان منم ولی، جیسم ایله جانه سیغمازام

هم صدفم، هم اینجییم، حشرو صیرات ادینجییم
بونجا قوماش و رخت ایله من بو دوكانه سیغمازام

گنجی- نیهان منم من اوش، عئینی- عیان منم، من اوش،
گؤوهری- كان منم من اوش، بحرو و كانه سیغمازام

گرچی موحیطی- اعظمم، آدیم آدامدیر، آدمم
دار ایله كونفكان منم، من بو مكانه سیغمازام

جان ایله هم جاهان منم، دهریله هم زامان منم
گؤر بو لطیفئیی كی من، دهرو زمانه سیغمازام

نجوم ایله فلك منم، وهی ایله هم ملك منم
چك دیلینی و ابسم اول من بو لیسانه سیغمازام

زرره منم، گونش منم، چار ایله پنجو شئش منم
صورتی گؤر بیان ایله، چونكی بیانه سیغمازام

ذات ایلیم صیفات ایله، قدر ایلیم برات ایله
گولشكرم نبات ایله، بسطه دهانه سیغمازام

نار منم، شجر منم، عرشه چیخان هجر منم
گؤر بو اودون زبانه سین، من بو زبانه سیغمازام

شمس منم، قمر منم، شهد منم، شكر منم
روحی- روان باغیشلارام، روحی- روانه سیغمازام

گرچی بو گون نسیمیم، هاشیمیم، قورئیشیم
بوندان اولودور آیتیم، آیت و شأنه سیغمازام

عمادالدین نسیمی