عاشیق قانینی وسمه لی قانین نهان ایچر
جؤوهرلی تیغ قین آرا پیوسته قان ایچر
ائتدوكجه قان كؤنوللری اول لعلی آتشین،
آبی حیات تك قارا زولفون روان ایچر
تا بیر پیاله وئردی، كباب ائتدی باغریمی،
هر كیم اونون الینده‌ن ایچر باده، قان ایچر
ایللر یاشار خیضر كیمی هر كیم كی، گئجلر،
گول اوزلو یاریلن مئیی چون ارغوان ایچر
آدم نه‌دیر كی، ایچمسون اول وئردیگین شراب،
وئرسن اگر، فرشته مئیی بی‌گمان ایچر
ساقی منیمله شیشه‌ی پیمانه نئیله‌سون،
دریانی بیر نفسده بو ریگی روان ایچر
تئزراق چكه‌ر ندامته بد مست‌یلیك یولو،
هر كیم كی، یاخشی ایچسه شرابی یامان ایچر
صائب كی، من اونون سؤزونو یئره سالمادیم،
بیلمم نیچون منیم قانیمی آسمان ایچر
صائب تبریزی
