ای غنچه دهن، سیم بدن، دلبر طناز ¤ ای سرو سر افراز!
اُولدوم داخی، قوربانین اولوم، رحم ائله بیر آز ¤ بسدیر بو قده ر ناز.
یاندیم، كوله دوندیم، یاناسان سن ده منیم تك، ¤ ای دختر ترسا،
اول ناكس ایله اولما داخی همدم و همراز، ¤ والله بئله اولماز.
آدم كیمی چوخداندیر اولوب ورد زبانیم، ¤ یا ربی ظلمنا!
اما كی نه حاصیل او جفا پیشه اینانماز، ¤ بیر دم منه باخماز.
سن بویله بیلیردن كی اوزون عاشیق اولوبسان، ¤ كول باشینا اولسون!
دور پوفله اوجاغی، بو اودون یاشدیر، آلیشماز،¤  اوز باشینا یانماز.
مین داغی اگر بیر نفسه جانیما قویسا، ¤ بیر اوف دئمه رم من،
اما اونو گور بیرجه منی یانینا قویماز، ¤ بیر بوسه یه قییماز.
قالدی داخی چون محشره بو حسرت دیدار، ¤ ای یار وفادار!
باری هر ایكی ایلده سوروش حالیمی آژ – ماز، ¤ یا بیرجه كاغیذ یاز.
طوطی كیمی فریاد ائله رم خسته و رنجور،¤  بو كونج قفسده،
بیر پسته ایله كیمسه منی یادینا سالماز، ¤ بیر كونلومو آلماز.
ای بولبول بیچاره! فغات ائتمه دمادم، ¤ صبر ائیله دوت آرام،
دائیم كی قیش اولماز، مئی همیشه بئله قالماز، ¤ البته گلر یاز.
اوز وورما، منی سئیر گولوستانه آپارما، ¤ ای همدم جانی!
یوز فصل باهار اولسا، منیم كونلوم آچیلماز،¤ بو كئفدن آییلماز.
یاریم یئنه مندن كوسوبن آجیق ائدیبدیر،¤ اوخ! اوخ! آمان آللاه!
بیلمم نه قیلیم، چاره ندیر، بیر اوزون آچماز،¤ بیر كلمه دانیشماز.
كونلوم ائوینی لشكر غم ائیله دی ویران،¤ ساقی سنه قوربان!
دور وئركی بو سیسقا بیر–ایكی جامیله دویماز، ¤ تا دوشمه سه، قانماز.
سال غولغوله، بو گنبد افلاكه، خروش ائت، ¤ ای دف زن چابك!
مطرب! داخی سن شـّـد ائله بیر نغمۀ شهناز، ¤ ای مرغ خوش آواز.
هر نه دئیه جكسن، دئه گیلن، جانیما خوشدور،¤ ای زاهید بد كیش!
دریایا داش آت، یا قایا سال، ذره جه داشماز،¤ هرگیز كی بولاشماز.
باخما كی بئله عاجز و مسكیندی نباتی، ¤ هی! هی! حذر اوندان!

سیدابوالقاسم نباتی