بیلمه دیم  اویدوم  بومجنون كونلومون فریادینه

عشقه دیل وئردیم  بلادان باشقا بیر شئی گوءرمه دیم

روحی-مجروحوم گوزللردن  وفا بكلر یئنه

من هنوز اصلا جفادان باشقا بیرشئی گوءرمه دیم

گوءرمه دیم اصلا تیكانسیز گول  قارانلیق سیز ایشیق

هروصالی دایما تعقیب ائدر بیر آیریلیق

سوءیله ییرلر  دایمی ذووقو سعادت وار یازیق

سئیر ائدیب بوش ادعادان باشقا بیرشئی گوءرمه دیم

گوءردویوم هر مضطراب سیمایه  دویدوم مرحمت

یاره  هم اغیاره یاراولدوم دا  سئودیم بی جهت

آشینا ظن ائتدیگیم هراوزده  هیهات ... عاقبت

بوش تملق دن   ریادان باشقا بیرشئی گوءرمه دیم

هرمحبت بیرخیانت  هرگولوش بیر حیله دیر

هرسعادت روحو اوخشار  چوخ سوءنوك بیرشعله دیر

بلكه وار سهویم؟ فقط گوءردوكلریم هپ بوءیله دیر...

گوءرمه دیم اصلا بلادان باشقا بیرشئی گوءرمه دیم

هیجران داشی ووردون كورگیمدن

آتدین منی   آتدین منی    آتدین

من شكلینی آسدیم اوره گیمدن

فیكریمده  خیالیمداسان هرآن

سن سیزده سنین عطرینی دویدوم

باغچامدا گولومدن چیچگیمدن

چیخدیم یولا وصلیم هوسی-له

هریولدان اوءتندن سنی سوردوم

ال چكمه دی  هیجران اتگیمدن

آتدین منی   آتدین منی    آتدین

من شكلینی آسدیم اوره گیمدن

قلبیم ده سنین  منده سنین  جان دا سنین دیر

ییخسان   داغیدیب   محمو ائدیب   آتسان دا سنین دیر

گوندوزلری هیجرانینا  یوخ تابی-توانیم

هیجران گئجه سینده نه جفا چكمه دی جانیم!

سن گول منه  گول! گول  بوحیاتین اوءزو گولسون

بال شهدی-لبیندن سوزولوب شعره توءكولسون

آچ زولفونو قوی دان یئری چوءهره نده  سوءكولسون

قوربان دیله سین  جان دیله سین  جان دا سنین دیر

محمدسعیداردوبادی

زولفونده نه لازیم ، گؤزلیم ، شانه دولانسین ؟

قویما او حرمخانه نی بیگانه دولانسین

عیب ایله مه ، كویوندا دولانسام گئجه گوندوز

شمعین گرك اطرافینه پروانه دولانسین

ساقی دولانیم باشینا مئی جامینی گزدیر

سرمست اولوم ، باشیما میخانه دولانسین

اول زولفه كؤنول وئرمه ، دییرلر منه ال چك

اونسوز نئجه بس بو دل دیوانه دولانسین

مجنون نه برابر منه صحرالره قاچدی

عشق اهلی اودور عرصه ده مردانه دولانسین

اغیار ایله اؤز یارینی همدم گؤرن عاشیق

دوشسون او گره ك دشت و بیابانه دولانسین

سرخوش لیق ایله عؤمرونی صرف ائیله مه  واحید

عارف اونا دییرلر كی ، حكیمانه دولانسین

علی آقا واحید

 *عاشیق اولدوز

آذربایجان زمان-زمان

دویان دگیل گؤزوم سندن

قان قانیندان، جان جانیندان

عمروم سندن، اؤزوم سندن

سن آرزومون چیچه یی سن

گؤزه لیم سن، گؤرچه ییم سن

سن الهامین اوره یی سن

مایالانیب سؤزوم سندن

سن ابدی شان- شهرتیم

آدیم سانیم، دیانتیم

كرم عشقیمة محبتیم

جان مندندیر دوزوم سندن

سن عمرومون باهار یازی

ائتمز طالع یازان یازی

آزافلی الینده سازی

دئیر دوزوم-دوزوم سندن

میكائیل آزافلی

گلوبدور تنگه ای ظالم ، ستمله قان اولان كؤنلوم

همیشه باغ وصلینده ، گولوب خندان اولان كؤنلوم

دوشوب مجنون كیمی ، صحرایه بیر لیلی فراقیندا

بوتون عاشقلر ایچره ، منبع عرفان اولان كؤنلوم

نه اولدو بیلمه دیم دوشدو ، جدا گولزار كویوندان

همیشه خوان وصلین بزمینه ، مهمان اولان كؤنلوم

كیمه بیلمم ، گئدیب اظهار قیلسین محنت عشقین

دؤنوبدور قانه هیجرینده غمی پنهان اولان كؤنلوم

نه چاره ائیله سین ، بیلمم خلاص ائتسین اؤزون غمدن

اسیر محنت و پا بسته هیجران اولان كؤنلوم

اولورمی بیر زمان خرم ، یئتیشسه وصل جانانه

غم هجرینله افغانلار چكیب ، گریان اولان كؤنلوم

منم فرهاد ! عصرین سئودیگی واحید  گوزل لر دیر

اودور كی لاله داغین گؤستریر ، ویران اولان كؤنلوم

علی آقاواحید

حسنون اولدوقجا فزون،عشق اهلی آرتیق زار اولور

حسن نه مقدار اولورسا، عشق اول مقدار اولور!

جنّت اوچون منع ائدن عاشقلری دیداردان

بیلمه‌میش كیم جنّتی عاشقلرین دیدار اولور

عشق دردیندن اولور عاشق مزاجی مستقیم

عاشقین دردینه درمان ائتسه‌لر بیمار اولور

زاهد بی‌خود نه بیلسین ذوقونو عشق اهلی‌نین؟

بیر عجب مئی‌دیر محبّت كیم ایچن، بیدار اولور!

عشق سئوداسینا صرف ائیلر فضولی عمرونو

بیلمزم بو خواب غفلتدن هاچان بیدار اولور؟

 فضولی

دئدیم: فــلك اینصـافا گل

دئدی: اوزوم بیــلن وقـتی

دئدیم:كونول بیرشاداول گل

دئدی: آغ گــون گلن وقتی

دئدیم: او گون ساچیلارمی؟

دئدی :حقدن قاچــیرارمی

دئدیم: عینیم آچــیلارمی

دئدی: دوسـلار گولن وقتی

آزافلی دا غم یامان دیر

دئدی:دردی آت آمـان دیر

دئدیم:بایرام نه زمان دیر

دئدی: ظالیم اولـــن وقتی

میكائیل آزافلی

بیر كور تانیرام، گؤزو كورسادا، اؤزو كور دئییل

بعضن غم اودوندا قوورولسادا

عاغلینا حیسسینه، او نان كور دئییل

گئجه لی گوندوزلو یازیر اوخویور

عاغیلی گؤزویله او گؤرور، دویور

آنجاق بیری ده وار كور دئییل سه ده

گؤزو گؤرمور

دوستو گؤز اؤنونده اؤلدورولسه ده

گؤرمه دیم دئییر

یاخشی یااورتاقدیر یامانی گؤرمور

او ساعـاتا بـاخیر زامانی گؤرمور

فیــكرینی حیسسینی اوجادان دئـمه ز

بعضن گؤردویونو گؤرمه ك ایسته مه ز

گــؤزلری گؤرمــویه ن كور دئییل هـله

گؤرمه ك ایسته مییه ن كوردور، دئییرم

بئله موغــاویله بئـله جاهیله

حیاتین اؤزوره قوردور  دئییرم

صـــــــابر