ثرادن بیر ده لی شیطان دئیر: اینسانلار، اینسانلار!

نه دیر دونیانی دوتموش علم لر، عیرفانلار، اینسانلار!

قانان كیم، قاندیران كیم، فیض یاب اولسا عوام الناس

دوشر شان و شرف دن ملالار، ایشانلار*، اینسانلار!

سئورمی اهل استبداد ملت هوشیار اولسون؟

بونا راضی اولورمو بیرنئچه وجدانلار، اینسانلار!

آییلمیش رنجبرلر، آلماق ایستر حق مشروعین

نه یئرده قالمیسیز بگلر، آغالار، خانلار، اینسانلار!

محررلر، مفتن لر اوسانمازلار، اوتانمازلار

بازارلار، هرزه لر، افسانه لر، هذیانلار، اینسانلار!

شرارت دن چكیب ال، خیره مایل اولمایین بیر دم

كسین باشلار، الین جانلار، تؤكون مین قانلار، اینسانلار!

بشر سیز، سیزده قان تؤكمك طبیعی در، جبلی دیر

بوفطرتدن اوزاقدیر، شبهه سیز، شیطانلار، اینسانلار؟

دگول میحیف دل لردن غبار جهل محو اولسون

نچون هرگونده قاندان قوپماسین طوفانلار... اینسانلار!

دمادم نفس اماره دئمكده اُقتل الاخوان

نچون سالم قالا باشلار، بدنلار، جانلار،اینسانلار!

جهالت پرده سین چاك ائتمه یین، اوندا گؤره ر سیز كیم

ثرادیر جسم لر، هم نفس لر، شیطانلار، اینسانلار!

*- ایشان: اوزبك و تاتار واعظلری

صابر

چوخ گوزللر گوردوم آختاردیم بوتون دنیانی من

تاپمادیم  عالمده اوز كونلوم سئون جانانی من

بی نوا پروانه لر تك  یئتمه دیم مقصودیما

عشق سوداسیله یاندیردیم بو شیرین جانی من

نازنین ، آهو باخیشلی چوخ پری لر گورموشم

سئو یمه دیم  ائوز سئوگیلیمدن باشقا بیر جیرانی من

بولبول نالانی یم من بیر گول اوزلی دلبرین

نیلره م هر لاله اوزلی غنچه ی خندانی من

هر گولون بیر عطری وار هر غنچه نین بیر نشئه سی

اولموشام چوخ نازنین لر باغینین باغبانی من

وار امیدیم  وصل جانانه یئتیشسین تئز الیم

آهیله سوندوررم آخر ، آتش هجرانی من

 واحیدم  بیمار عشقم ، غیردن یوخ منتیم

دردیمه جانان الیله ائیله رم درمانی من

علی آقا واحید

اَلده اولســا اختیــــــیارین

ائله خلقــــه،‌ائله حــرمت

وئر پایینى گناهـــــكارین

ائتمه فتنه – فعله حرمت

ظالیــــــــم لرده مروت گزمه

آلچـــــاق لاردا غیرت گزمه

حرمت ائدیب ،حرمت گزمه

تمنــــــــــاسیز ائله حرمت

آخماق قیشدا یاى آختارار

تنبل حاضیر پاى آختارار

زایین اوغلو زاى آختارار

اینـــانما كى بیـــله حرمت

دوغرولارلا یئـر- گوى دولا

یولســـــــوزلارى چكه یولا

بودونیـــــــــــایا حاكم اولا

 دوشه دیلدن - دیله حرمت  

آزافلى ،‌چوخ بودن اؤتمه

اؤز یئریندن اوزاق گئتمه

حرمت سیزه حرمت ائتمه

اوندا دؤنر كوله حرمـــت 

میكائیل آزافلی

اینسان اولان پیسه یاخشی سویله مز

چكیلسه ده دارا ائل آراسیندا

پالید كیمی كولك قارشیندا دورار

قایا تك دایانار سئل آراسیندا

یایای دوز گََُونلویو دوغما ائلینده

حقٌه آرخا اولار دوز سوز دیلینده

ایگید بابك كیمی شـمشیر الینده

های سالار موغانلا میل آراسیندا

ایشیق ساچار یوردا بیر اوجاغ كیمی

سو وئرر سوسوزا بیر بولاق كیمی

یارار سینه سینی بیر داراق كیمی

چاتا یارا قالا تئل آراسیندا

ایلانلار گوزونه اودلار سالـماغا

دونیا بویو آدی دیری قالـماغا

یازیق كوتله لرین حقٌین آلـماغا

قالـخار داغا یاشار بئل آراسیندا

قیزیل قفس ، اوچار قوشا زینداندی

قفسده بولبولون اورگی قاندی

آجی آغریسینا شیرین درماندی

سانـجیلا تیكاننا گول آراسیندا

ال اوزر جانیندان سوز وئرمز یادا

اینسانلیغی ساتـماز شوهرته آدا

 سیــد  كیمی اودا داغلی دونیادا

چاغیرار آزادلیق ائل آراسیندا

سیدعظیم شیروانی 

هر عاشق اولان عشقه گرفتار اولابیلمز

هـــر خورما ساتان میــثم تمار اولابیلمز

مخـلوق خداوند اوزونه اولمیان عاشیق

حــق عاشقه تك صاحب ایثار اولابیلمز

دونیـــا مالینا شـهرتینه وورقون اولانلار

ایــنفاق ایله مز  طالب دیدار اولابیلمز

ماءموره اگررشوه یماخ اولماسا عادت

مظلوملارین قانینی ظالیم سورا بیلمز

مــــیمون تكین هر سوزه تقلید ایلینلر

اندیشـــــه ادیب صاحب افكار اولابیلمز

صابر یمه غم هر گونین ئوز قصه سه واردیر

مفــــــراق پاراسی گوهر شهوار اولابیلمز

صـــــــابر

ای خسته قوش آواره گزیرسن بو دیاری

زنداندی قفسدی چمنی،باغی،باهاری

گوزله اوزووی اوچی دی هریانی بو یوردون

قوزغون كیمی دورت گوزلو گزیر كورپه شكاری

فرصت دالی سینجا گزیر ال یئری تاپسا

ویران قویاجاق یوردونی ای كوینكی ساری

تیك اوز یووانی قویما سنه ال تاپا اوچی

سن بو یووانئن صاحیبی سن،قان یئنه باری

جهد ائیله كی،جان قورتاراسان اوچی الیندن

دوشسن تورا،فریاد ائلمه،چك بو فشاری

گولشنده كی یوخ ذوق وصفا ای ساری كوینك

قاچ قاچ بو یئرین زهرلی دیر دارو نداری

دیللنسن اگر،اوچی ائده ر قانئنا غلتان

اوچسان آ یازئق!تیر جفا قلبینی یاری

مین فئرتانا قالخئب،دوگه جك،باشئنا طوفان

هر كیمده اولا،داغ كیمی دونیادا ووقاری

گلسه نه قده ر دردو بلا ،داغ كیمی دور باخ

ایدین دی بو سوز"توستو گئده ر گوچكه ساری"

ایستر سنی صیاد اوزونه رام ائده امما

اویغودا گوره ر،اج تویوق البتده كی داری

بو یاخشی مثل دیر كی بیزیم ائلده دئمیشلر:

بیر باخ اشاغا ،باخما اوزونده ن ده یوخاری

غم غصه كیچیك قلبینی گر دوگسه سئخئلما

بو گونده كئچر،اخیری،غملرده قوتاری

اوندا كی چئخارگون،یاییلار عالمه بیرده ن

اوندا كی قارادان یئری ،صبح اولجاق اغاری

داغی-داشی اسوده خیالیله گزه رسن

گولشنده نه شاختا گوره سن،داغدا نه قاری

ظولمون ائوی ویران اولو ،ظالیم دوشه ر الدن

قان دورماز اگر كسسه پئچاق قئرسا داماری

بختین قاپوسی ایندی قئفئلانسا دارئخما!

هر بیر قئفئلئن واردی طبیعتده اچاری

اوز جانوویلن اویناما بو عرصه ده "شیدا"

لیلاج دغلبازیله قئزدئر ما قوماری

یحیی شیدا

هر در دینه قالان كسده درمان اولا چتیندی

هر اوخویان عالیم اولان ، لقمان اولان چتیندی

هر ایاق اوسته یئرییه ن انسان اولا چتیندی

بو دونیا نین قوجاغیندا ، جسدده وار ، جان دا وار

دوغرو یولدا گزسن اگر شهرت ده وار ، شان دا  وار

دوغـــــرو یولدان آزسان اگر ، قادا دا وار ، قان دا وار

آتالار گـــــوزه ل دئییب كی ، حاق نزیله ر اوزوامه ز

گئج ائیلییه ر،گوج ائیلییه ر حاق دا وار ، دیوان دا وار

وطن اوغلو  خوش سوزلره خوش اویاجاق دونیادا

گاه سئوینجی ، گاه كده ری داشییاجاق دونیادا

نقده ر كی بنی انسان یاشییاجاق دونیادا

ناداندا وار ، قانان دا وار ، گدا دا وار ، خان دا وار

بهمن وطن اوغلی

انتظار اهلی دیور دونیا گلستان اولا جا خ

اءسه جاخ باد صبا عازم بستان اولا جاخ

شورلن شدت لن قاینیه جاخ حق بولاغی

باغ وبستان گل آچیپ دامنی الوان اولا جاخ

گتریب مژده صبا یوسف دوران گله جاخ

سور وساطیله گایب وارد تهران اولا جاخ

سالاجاخ زلزله بو شهره بوتون ترپده جاخ

یخلیب كاخ ستم خاكیله یكسان اولاجاخ

گنه حلاج زمانه دوشه جاخ عشق اودونا

هی انا الحق چاغرییب منجی انسان اولاجاخ

گنه شمشیر عدالت دوشه جاخ حق النه

آتش قهر خدا اوندا نمایان اولا جاخ

وعده ی حق ده ضعیف لر آلاجاخ یر اوزونی

اقویا قالسا دا بیر گوشه ده پنهان اولاجاخ

یخیلب بت كده بت لر هامی بیردن سیناجاخ

ابراهیمین بالاسی صاحب فرمان اولاجاخ

آرزوم واردی گورم ظلم اوینین یانما سینین

ظالم آخرده گورم ظلمنه قوربان اولاجاخ

صــــــــــابر

بیر نفر اهل وفا مین بیوفادن یاخشیدر

بیر صداقت اهلی مین اهل ریادن یاخشیدر

 هانسی گولدور حسنده سندن گوزلیدر،سوگیلیم؟

 هانسی بلبل عشقده من بینوادن یاخشیدر؟
 
 قاشلارین چرخین هلالیندن ،اوزین خورشیددن

صورتین آیینه گیتی نمادن یاخشیدر 
  
 بیرداها خالین گوزه للیك آرتیریر روخسارینه

 بیر غلط سوزدور دئمشیلر ،آغ قارادان یاخشیدر 
 
  گوزلرین صحرای چین آهولریندن دیلفریب

عنبرین گیسولرین مشك خطادن یاخشیدر
 
 صحتی بیمار ،عشقین كعبهء كوینده دیر

 اهل درده خاك راهین توتیادن یاخشیدر
 
 مین بلا طوفان قوپسا ،ذره گلمه ز عینیمه

رخنه گورمز هربنا كیم ابتدادن یاخشیدر
 
 جاهله تبلیغ عرفان ایله ملك آسان دگیل

دیدهء خفاش ایچون ظلمت ضیادن یاخشیدر
 
  واحید،انصافأ دئسین تبریز ده دوستوم اعتماد

 گنجلرده هانسی شاعر بیر یادن یاخشیدر

علی آقا واحید

ای شوخ یئنه همدم اولوب كاكله زولفون
تحریض ائدیر اول كافری صید دله زولفون

دین و دلیمی غارت ائدیب ائیلمز انصاف
شیمدی نه تمنا ایله ائیلر گله زولفون؟

هـــــر لحظه اورور سینه مه مین ناوك دلــــــدوز
مژگانین ایله یوخسا ده ییب دیل – دیله زولفون؟

حیـــــــرتده یم، آیا كی، نه دیر فتـــنۀ  "هاروت"
ای شوخ، مگر سئحر اوخویوب  "بابل"ه زولفون؟

تنها سفر ائتـــــمه، گل آپار جانیمی، اما
بو سری نهان ساخلا، مبادا بیله زولفون

آلـــداتدی كؤنول مرغنو اول دانۀ خالین
دام ره عقل اولدو او پر سلسله زولفون

صابر كیمی غرق اولدو گؤزوم یاشینه جسمیم
دوتمــــــوب الیمی چكمدی بیر ساحله زولفون

صــــــــابر