یئنه اول ماه منیم آلدی قراریم بو گئجه

چیخاجاق‌دیر فلكه ناله و زاریم بو گئجه!

شمع‌وش محرم بزم ائیله‌دی اول ماه منی

یاناجاق‌دیر یئنه هیجر اودونا واریم بو گئجه

هم وصالی وورار اود جانیما، هم هیجرانی

بیر عجب شمع‌ایله دوشدو، سر و كاریم بو گئجه!

نه توتون‌دور كی چیخار چرخه، دل زاره مگر

هیجر داغینی اورار لاله عذاریم بو گئجه!

صبحه سالدی بو گئجه شمع كیمی قتلیمی هیجر

اولا كیم صبح گلینجه، گله یاریم بو گئجه

پاره- پاره جیگریم، ایت‌لرینه نذر اولسون

اول سر كویا اگر دوشسه گذاریم بو گئجه

وار ایدی صبح وصالینا فضولی اومّید

چیخماسا حسرت‌ایله جانِ فگاریم بو گئجه

فضولی

ای گوزوم عالم اینسانلیغا محرم سن اگر

ساكن اول مجلسِ میخانه‌ده، آدم‌سن اگر

عرفا اهلی ایچون مجلسِ مئی جنّت‌دیر

قویما بو بزمه قدم، اهلِ جهنم‌سن اگر

مئی ایچیب، سرخوش اولوب، اؤزگه‌نی تحقیر ائیله‌مه،

سن اؤز اطوارینی تحقیر ائیله، سرسم‌سن اگر

ئولچوده‌ن خارجه چیخما، ییخار آخر سنی مئی،

توت الیم كی، هامودان ایچگیده محكم‌سن اگر

مست و مدهوش زامانیندا بیر آیینه‌یه باخ،

اؤزون اؤز عكسینی تصویر ائیله اعلم‌سن اگر

گور، سنی باده نه حاله سالوب، ای خانه خراب،

آغلا اؤز حالینه بیردم، نولا، خُرّم‌سن اگر،

حیف‌دیر باده‌یه صرف ائتدیگین اول شانلی حیات،

بیلّیك اوغروندا اونی صرف ائیله، حاتم‌سن اگر

مبتلادیر بو بلایه، دئمه، واحید اؤزی‌ده،

اونی‌دا علم‌ایله تشویق ائیله، آدم‌سن اگر

علی آقاواحید

آشفته لیگیم زلف سیه تاری بیلیرمی؟
یا رب، گؤره سن درد دلیم تاری بیلیرمی؟

بیلمز، بیلیرم یار منیم سوز نهانیم،
طوفانه دؤنن گؤز یاشیمی، باری، بیلیرمی؟

گیرم بو گئجه قالدی گؤزوم یولدا، نه نفعی،
اول ماه اؤزو ائتدیگی اقراری بیلیرمی؟

گیرم كی، دؤگر باشینی سجاده یه زاهد،
ترساده اولان معنی زنّاری بیلیرمی؟

واعظ كی، دئیر مئی ایچنه اهل جهنم،
بیر مغفرت قادر غفاری بیلیرمی؟

عابد كی، ائدیر جنّت ایله كوثره رغبت،
میخانه ایله بادۀ گولناری بیلیرمی؟

سیّد كی، بیلیر اؤز اؤزونو مرفعت اهلی،
بیرجه سوروشون، فیض دهو چاری بیلیرمی؟

سیدعظیم شیروانی

منی محروم ائدن روخساریدن زولفی پریشان دیر

بو دریایی لطافت موجی عنبر ایچره پینهان‌دیر

اگر خورشیدی تابان‌یله سنسیز هم‌شراب اولسام،

لبی لعلی مئی آلودی گؤزومده قانلو پئیكان‌دیر

دد و دامی موسخّر ائیله یوبدور جذبه‌ی عشقین،

دوگون مجنونی شیدا باشینا چتری سلیمان‌دیر

منی مكری رقیب آواره قیلدی یار كوییندن،

چیخاران آدمی فردوس‌یدن تزویری شیطان‌دیر

قاچان عاشیقلرین فیكرینه دوشدو اول عقیقی لب

كی، اونون بیر قارا گؤزلولرینده‌ن آبی حیوان‌دیر

مسلمانام، دئییر مستین، ایچیر عاشیقلرین قانین،

منم كافیر، اگر اول دوشمنی ایمان مسلمان‌دیر

محبّت اهلی هنگی جام و نشاطی درد دن دؤنمز،

نئچون چكسون خومار اول كیم همیشه ایچدیگی قان‌دیر

منی خاكی نه تنها اولموشام مجنون كیمی رسوا،

كی، اول درد دن فلك سنگی ملامت ایچره پینهان‌دیر

فلك‌لر قان ایچر گؤردوكجه تجرید اهلینی، صائب،

كی، یوقسیزلار حرامی‌لر گؤزینده تیغی عریان‌دیر

صائب تبریزی

منده مجنوندان فزون عاشیق لیك استعدادی وار

عاشق صادق منم، مجنونون آنجاق آدی وار!

نولا قان تؤكمكده ماهر اولسا چشمیم مردمی

نطفه‌ی قابل دورور غمزه‌ن كیمی اوستادی وار!

قیل تفاخر كیم سنین‌ده وار منیم تك عاشقین

لیلی‌نین مجنونو، شیرینین اگر فرهادی وار

اهل تمكینم، منی بنزتمه ای گول بولبوله

درده یوخ صبری اونون هر لحظه مین فریادی وار

اؤیله بد حالم كی احوالیم گؤرنده شاد اولور

هر كیمین كیم دور جوروندن دلِ ناشادی وار

گزمه ای كؤنلوم قوشو غافل فضای عشقده

كیم بو صحرانین گذرگاهیندا چوخ صیادی وار

ای فضولی! عشق منعین قیلما ناصحدن قبول

عقل تدبیری دیر اول، سانما كی بیر بُنیادی وار

فضولی

شمع كیم، روشن اولوب یانماغا پروانه اوچون،
یانماغیندان دخی پروانه یه پروا نه اوچون؟

وئرمییم خالوه ای گول، نیه من دنیانی،
چكدی جنّتدن ال آدم ائله بیر دانه اوچون

بیلمیرم زلفو اوچون شاننی خلق ائتدی خدا،
یا كی، زلف سیهین خلق ائله ییب شانه اوچون؟

بونجا كیم، حسنونو قرآنده وصف ائتدی خدا،
بیلمیشم كیم، ائله ییب مشق اونو میخانه اوچون

پیر میخانه علی دیر، اودور انوار جلی،
آشنانی تانی، سئیر ائیله مه بیگانه اوچون

اولماسایدی گیل آدمده جمالیندان اثر،
قابل اولمازدی اونون تینتی پیمانه اوچون

سیّدا، ائیله مه اوصاف علی دن غیری،
عمروی صرف ائلمه هر یئتن افسانه اوچون.

سیدعظیم شیروانی

حلقه اولدوق قاپیسیندا یئنه مئیخانه لرین

بو حالیله یئتیشك وصلینه پئیمانه لرین

بیزخراباتا اوشاق واختی گلیب دؤشمه میشیك

كرپیچ اولدوق دیواریندا بو قدیم خانه لرین

دیلیمین خنجری عاشیقلری دوغرار گؤندوز

گئجه شمعیم یاخاجاق آتشه پروانه لرین

مشورتله آچیلیر سیرّی اگر دونیامیزین

من دئییم سنده چئویر تسبحینین دانه لرین

ایستریك تئز قوتارا صوحبتینی ایندی قلم

واقیف اوللوق حالینا سونرادا دیوانه لرین

خوابی غفلت آلاجاق آلسا بیزی آغوشونا

بیرجه آندا دؤشریك قوینونا افسانه لرین

او گوزللر ائله هوپموشدو بیزیم جانیمیزا

صائب اولدوق مایاسی بیزده بو بوتخانه لرین

صائب تبریزی

گئتمه بونازایله، گوزه لیم ، بیر دایان گوروم

 عشقینده من یانان كیمی بیر سن‌ده یان گؤروم

درد اؤلدوره‌ر منی سنی گر بیرده، سئوگیلیم

خائن رقیبلرله گؤلوب اوینایان گؤروم

چشم زمانه‌دن سنه آفت توخونماسین

دائم او قاره زلفی گؤز اوستونده یان گؤروم!

نه لاله بیتمه‌سین، نه ده سونبول، سن اولماسان

نه شاخ گول‌ده بولبول ایچون آشیان گؤروم

مستانه گؤزلرین كیمی سن مست سن هله

چوخ باخما، نازایله، گؤزه‌لیم، بیر اویان گؤروم!

واحید، جهاندا هر گؤزه‌لین دوشسه‌م عشقینه

بیر خیر گؤرمه‌سه‌م ده، گره‌ك مین زیان گؤروم

علی آقاواحید

اولارام درده همدم
سنی غملی گؤرنده
ساچلاریما دوشر دن
سنی غملی گؤرنده

بوران اولار قار اولا ر
ایشیم آه و زار اولار
دونیا منه تار اولار
سنی غملی گؤرنده

او گونش اوزونو غم
بورومه سین دومان كم
ساچلاریما دوشر دن
سنی غملی گؤرنده

بوران اولار قار اولار
ایشیم آه و زار اولار
منه دونیا تار اولار
سنی غملی گؤرنده

اسر كولك دایانار
گؤیلر قارا بویانار
عاشق اودلارا یانار
سنی غملی گؤرنده

بوران اولار قار اولار
ایشیم آه و زار اولار
منه دونیا تار اولار
سنی غملی گؤرنده

اولدی كؤنلوم یئنه بیـر زولف چلیپا دلیسی

دوشدی زنجیره نه خـوش یئرده بو سودا دلیسی

عور و عریان باش آچیق اوز چؤووروب صحرایه

قویدی مجــنونی یاری یولدا بو صحـرا دلیسی

عاشــق سـوخته‌دیر بولبول شــیدا كی دگیل

كی اولوبدور دیه‌سن بیــر گـول حمرا دلیسی

رب ارنی دئیلن ذیــكری دؤنوب موســــایه

دشت ایمن‌ده اولوب نور تـــجلی دلـــیسی

چوخلاری مست قیلیب ساقی میـــخانه عشــق

گؤرمدی كیمسه منـیم تك بئله رسوا دلیسی

دئمه فرهادایله مـجنون دلی‌دیربیربری باخ

بیری شیرین دلی‌سیدر بیری لیلی دلیسی

كنج وحدتده تباه اولدی عزیزعؤمروم حئییف

اولمادی یار منه بیر بت زیبا دلی‌سی

خوشلیب‌دیر گؤره‌سن هانسی مزارستانی

دیون اول زاهده ای بیر كوكه حلوا دلی‌سی

گول ایاغینده سحر وقتی ییخیلمیشدیم مست

بیری سسلندی كی ای بو گول رعنا دلیسی

بیر آییل گؤركی نباتی نئجه اوراد ائله‌ر

نه یاتیبسان بئله ای بیر گؤز شهلا دلیسی

سیدابوالقاسم نباتی