روحوم یئنه لبریزی-سعادت...
یا رب، بو نه طوفانی-لطافت!؟
گؤیدن یئره ائنمیش كیبی جنّت،
یئر-یئر ساچیلیر نوری-مسرت.
هپ قول-قولا پورشئوقو شتارت
رقص ائتمه‌ده - آزاده‌یی-صنعت -
ارواحی-لطیفی-مله‌كیت.
بیلمم بو نه حالت، نه قییافت؟
یا رب، بو نه صفوت، نه صباهت!
هپ شعرله الحانی-زرافت
ممزوج اولاراق سانكی بو سات،
قارشیمدا گولومسر ابدیت.
بو لئوهه‌ی-اولویته، البت،
رؤ'یا دئیه‌مم، عینی-حقیقت...
اولماز بو قدر نشعلی رؤیا،
روحوم بونا قانئ دئییل اصلا.
هئیهات!.. بو بیر صحنه‌ی-سئودا...
بیر صحنه‌ی-سئودا كی، سراپا
مجذوب اونا هر بیر دیلی-شئیدا.
ارواحی-ملایك بئله گویا
ائیلر اونو حسرتله تماشا.
انواره بورونموش كیبی هر یئر،
آهنگی-مسرتله گولومسر؛
بین ناز ایله هر چوهره‌ی-دیلبر
عرض ائتمه‌ده بیر نعشه‌یی-دیگر؛
گؤزلر، هله گؤزلر، هله گؤزلر!..
یا رب، نه قدر جازیبپرور!؟
یا رب، نه قدر خاریقگوستر!؟
تیترك، داغینیق، شوخو فوسونكار،
قومرال، ساریشین، دالغالی ساچلار.
انظاری-تاماشاگره یوللار
منصور اولاراق بیر ییغین اشعار،
گاهی اولوب اذواقیله سرشار،
پورخنده ائدر هر لبی-سههار
پارلاق و بَیاز اینجیلر عیسیر.
افسوس كی، عومروم كیبی هر آن،
هر خطوه‌ده بو لئیلی-زرفشان
بیر هیچلییه اولماقدا شیتابان،
حسرتله باقیب ایشته اوزاقدان
دان ییلدیزی گویا ائدر اعلان:
“یاقلاشمادا آرتیق دمی-هیجران،
ائی مستی-محاسین اولان اینسان!
آل! ایشته گونشدن سیزه فرمان!..”

حسین جاوید

آمان الله، ینه شیطان گلیب ایمان آپارا،

قورویون، قویمویون ایمانوزو شیطان آپارا.

منیم اینسانلیغیمین گؤر نه هاسان یاوادیر،

كی گونوز قولی-بی‌یابان گلیر اینسان آپارا.

چؤرك آلمیش الینه، آج نئجه تاقت گتیسین؟

ائله بیل یاز گئجه‌سی قیز گلیب اوغلان آپارا.

قانلی دیرناقلاریلان اینگیلیس ال قاتدی بیزه،

باخیسان راس دا آرازدان كئچیر ایران آپارا.

قم آشیب-داشدی داها، خلقیله شوخلوق ائله‌مز،

سئل گرك ائل داغیدا، ائو ییخا، ائیوان آپارا.

خرمنی ساققیزا وئردیك، نه یامان چرچیدی بو؟

هئی گلیر كنده، بیزه درد وئره، درمان آپارا.

بو قارانلیق گئجه‌لرده قاپیمیز پیس دؤیولور،

نه بیلیم، بلكه عجلدیر، دایانیب جان آپارا.

آناما سؤیله‌یین: اوغلو ییخیلیب سنگرده،

"تئللرین باس یاراما، قویما منی قان آپارا”.

آرادان بیر ده بیزی بؤلسه‌لر اربابلاریمیز،

قورخورام قویمییالار تبریزی تهران آپارا.

قارا طوفان كی، دخی خلقه شولوخلوق ائله‌مز،

سئل گرك ائل داغیدا، ائو ییخا، ائیوان آپارا.

سلیقه‌لی اوغرو ویلایتده چوخالمیش اولسا،

شهریاردان دا گرك بیر دولو دیوان آپارا.

شهــریار

كونلوم چابالیر كفرایله ایمان آراسیندا

آواره دوشوب عدن ایله  نیران آراسیندا

عقلیم اوزو  شیطاندی سالیب جنگی جدالی

صلح ائتمز  اولان عشقیله ایمان آراسیندا

تئللردی چكن داره  دابانه یئتیشیب كن

جانیمدی چیخان  دردایله درمان آراسیندا

بو غنچه دوداقدان نئجه كئچسین دلی كونلوم

آیدین سو ایچر چاه زنخدان آراسیندا

مست اولماغی اویرتدی منه نرگس مستی

اویناتدی نئجه گور منی مستان آراسیندا

زاهد نه بیلیر گول ندی گولشن ندیر آنجاق

ساخلانمیش او خام ظلمت زندان آراسیندا

اسلامدی بیزیم دینیمیز آمما بو حقیقت

گیزیلینده قالیب بوللو مسلمان آراسیندا

انسان اولان آزاد یارانیبدیر  اونو بیلسه

حبس ائتمز اوزون بیر نئچه عنوان آراسیندا

طوفان دئدیگین آز-چوخ اولار  جوده لیكن

انساندی قالیب  یوز دلی طوفان آراسیندا

"شادی" بو آز  عومرون نئجه سووسون اونا اویرت

مستانه دوشه یاخشی دی  یاران آراسیندا

حسین نجفی(شادی)

چوخ ییرغالانیب قاش گؤزونو آتما آی اوغلان
توركم منه چوخ فارسی قیریلداتما آی اوغلان

منی یاندیردی  فضولی كیمی هجران دردی

اوزون ایللر دئمه دیم  خلقه بو پنهان دردی

عاشقم  عشقیمی گیزلتمگه حقیم یوخدور

همدمیمدیر  گئجه لر   سئوگیلی جانان دردی

ووردو  سولدوردو  خزان سئوگیلیمین گلشنینی

داشییر  گور نئجه  قلبیمده بیر عمان دردی!

عشقیمین  هرایكی ساحلده  دردین كوكلری وار

یوخ  دگیل  دردیمه تای  عشقده صنعان دردی

هارداسان  هاردا  خیالیمداكی تبریزیلی  گوزل

تك سنین دردین اولوب ایندی سلیمان دردی؟!

سلیمان رستم

دردیمین درمانی یوخدور آتمیشام درمانیمی

گونده یوز دفعه توكورلر ماه رولار قانیمی

سویله كی زحمت ندن سن  چوخ چكیرسن ای طبیب

لحظه-لحظه بوقارا گوزلر آلیرلار جانیمی

من دونن تانریله بحث ائتدیم بونه خلقتدی كی

منده بیر جان خلق ائدیب مین ائتمیسن جانانیمی

سویله دی  ای عشقلی جانانه لر جانانه سی

ایندی تاپدیم من فضول آختاردیغیم شیطانیمی

گئتمیسیز سیز دوز یولا  اول آدام و حوا كیمی

من تانیردیم  تانرییام خلق ائتدیگیم انسانیمی

سویله دیم  سن ائتدیگین خلقت منی كئفلندیریر

گر فضوللوق ائیله سم  عفو ایله بو عنوانیمی

وئر اجازه بیرده من یاد ائیله ئیم  جانانه نی

آلمیسان روز ازلده عشق اوچون پیمانیمی

اینجه بئللی بیرقارا تئللی آغ اوزلو گورسه گوز

سینه ده  تنگ ائیله ییر  كونلوم منیم میدانیمی

بیر هنرلی عشوه لی  آنلاقی دلبر قازدیرار

جانیمین  دورد گوشه سینده  كوك سالان ایمانیمی

باخسا بیرعارف گورر باشدان باشا جانانه دیر

نقطه-نقطه نقش ائدن خال وخط دیوانیمی

نئیله ییم یوخ الده چاره چیرپینیر  عشقین قوشو

ایری قاشلار ایزله ییرلر  بیر به بیر  سئیرانیمی

خوش دئدی ساقی كی عشقین یوللاری آزاد دئییل

"شادی" سن آزاده اول مست ائت لب خندانیمی

حسین نجفی(شادی)

ایللردیر  اوزونه حسرت قالدیغیم

دوغما قارداشیمدان آرالییام من

دوشمنیم ده بیلسین   دوستوم دا بیلسین

هله ئولمه-میشم  یارالییام من.

هاردا النی آچیق انسان گورسه-نیز

هاردا اوركلرده  عصیان گورسه-نیز.

هاردا مكتبدن چوخ زندان گورسه-نیز

بیلین او یرلییه م   اورالییام من.

چوخداندیر  توی-دویون گورمه ییب  اوبام

خرمنده ئوزگه یچون  ایش گورور یابام.

ستارخاندیر آتام   بابكدیر بابام

ایندی بیلدینیزمی  هارالییام من؟!

سلیمان رستم

یاندیقجا كول اولدوم  اودا  دوندوم یئنه كولدن

بو درسی من آلدیم كوله دونموش یانار ائلدن

بولبول كیمی افغان ائده رم  دار قفسیمده

بیر گون سیناجاقدیر  بیر اولو  یئلدن

طوفان سالارام یئل كیمی سئللر توره در كن

چوخ گوجلو اولار ائل گوجو  البته كی سئلدن

خاطیرده دومانلار توره نیبدیر  دیله گلمز

آشفته غبارلار  سالا بیلمز منی دیلدن

پیمان قویولوبدور  من ایلن  ائل آراسیندا

كئچدیكجه  زامان  تازه له نر   سوز ایلی ایلدن

تئل تئل ائده بیلمز منی دوراندا  اسن یئل

بیر ضربه-یه  یوز نغمه چیغیر گور نئجه تئلدن

یئل باغلیدی ائل یوردونا ائلسیز ندی وارلیق

چن ده  ییغیشار  گونده چیخار  بیر گون او بئلدن

گونلر سووشار  آیدا چیخار ایلده گئدركن

باغ باغچا دولار  اییلی  عطیرلی ساری گولدن

یوسف-ده  زلیخاایله همدم اولو بیرگون

یوسف بدنی چیخدی آخان عشقلی نیلدن

"شادی" اوله-جك  عشقی ولی  اولمه-یه-جكدیر

بو رمز قالاندیر  نئجه كی  واردیر ازلدن

حسین نجفی(شادی)