دریا قوشویام قورخودا بیلمز منی طوفان
نئیلر بیر اولو داغه اگر پوسگوره طوفان؟
طوفان دا نه قدرت كی منی سالسین آیاقدان
ائلدن كوءكوم ائل كوءكونه باغلیام هر آن
كسگین قلمیم آلدی گوجون ائل نفسبندن
تا جامعه نین دردلرینه ائیله یه درمان
آی شانلی مقدس آنا ای كوءهنه دییاریم
هر امرینه آماده یم ایندی ندی فرمان؟
سنسن وئره ن عالمده منه شهرت و شوكت
سنسن منه شعریمده اولان سئوگولو جانان
آی شانلی وطن یاخشی بیلیرسن كی یولوندا
چوخ واخت اوتوراق یئرمنه اولموش قارا زندان
لاكین منی سارسیتمادی بو قورخولو حالت
میلچك قانادی یئتمه دی ایمانیما نوقصان
دوشمان دیلیمین خورلوغونا خیلی چالیشدی
آخیرده اوشوم مقصدینه تاپمادی امكان
گوندن گونه اوءتگم دیلیمین شهرتی آرتدی
گوءستردی كی دیل محمو اولاماز محو اولا دوشمان
"بال" اولسادا بیگانه دیلی منجه زهر دیر
اوءز دوغما دیلیم دیركی شیریندیر منه بالدان
بیر بویله حقیقت سسی یوكسلمه ده افسوس
هرعصرده حقسیز لیگه محكوم اولوب انسان
چوخ "حق بشر" دن دئدیلر لفظ ده آمما
معناده ندن چاتمادی اوءز حقینه بیر قان !
آسان اولو موشگول لر اگر اولسا اراده
اولماز كیشی عالمده چتین لیكده هراسان
قطعا چاتار ائولاد وطن حقینه بیر گون
اوگونكی نه ارباب ستمگر قالا نــــــه خان
غم چكمه كونول بیر یئنی دوران اولار اوندا
شادلیقدان اولار توتقون اوره ك لر یئنه خندان
عصرین دیلی زحمت كشه اوندا بئله سویلر:
چاپ غضبكارین نعشینه بو آت بودا مئیدان!
چوخلار دیله ییر وصلت جانانی ولاكین
جانانی آتار تهلوكه یه دوشسه اگر جان
یازدیم بو گوءزل شعری "نظامی" سایاغیندا
( حسنون گوءزل آیت لری آی سئوگیلی جانان )
مین فیرتینا باشیندان آشیب داغ كیمی دوردو
مین رنگه بو "شــــــــیدا "نی بویاندیرمادی دوران!
یحیی شیدا
يازينين قالاني
