كونلوم چابالیر كفرایله ایمان آراسیندا
آواره دوشوب عدن ایله نیران آراسیندا
عقلیم اوزو شیطاندی سالیب جنگی جدالی
صلح ائتمز اولان عشقیله ایمان آراسیندا
تئللردی چكن داره دابانه یئتیشیب كن
جانیمدی چیخان دردایله درمان آراسیندا
بو غنچه دوداقدان نئجه كئچسین دلی كونلوم
آیدین سو ایچر چاه زنخدان آراسیندا
مست اولماغی اویرتدی منه نرگس مستی
اویناتدی نئجه گور منی مستان آراسیندا
زاهد نه بیلیر گول ندی گولشن ندیر آنجاق
ساخلانمیش او خام ظلمت زندان آراسیندا
اسلامدی بیزیم دینیمیز آمما بو حقیقت
گیزیلینده قالیب بوللو مسلمان آراسیندا
انسان اولان آزاد یارانیبدیر اونو بیلسه
حبس ائتمز اوزون بیر نئچه عنوان آراسیندا
طوفان دئدیگین آز-چوخ اولار جوده لیكن
انساندی قالیب یوز دلی طوفان آراسیندا
"شادی" بو آز عومرون نئجه سووسون اونا اویرت
مستانه دوشه یاخشی دی یاران آراسیندا
حسین نجفی(شادی)
