كؤنول ایچــــره دوشـوب،فریــــــادلاریم داغدان داغا

ایسته ییر لرزه سالیب،سؤكسون! تملدن ییخـماغا

بو دلی فریاد قوشوم !! نیچون بگنــــــمیر آشیان؟

بیلمیرم  دردی ندیــر!؟، حســرت قالیبدیر یاتماغا !

ایسته ییر ترك ایله سین  اؤز منزیلین دوشسون چؤله

 بو  عطش قالمیــــــــش بیاباندا ،دوشـــور كام آلماغا

ندن  قلبیـــــــمده كی كؤزدن یئنه آتــــش تؤرلدیر ؟

اولمایا !!:گؤز یاشیمی ،نیسان ائدیر گولسوز باغـــا!

سانماسین تن-ده كی باش،بیلمدی دونیاده نه وار

بیلدی !،قوربان  ائلدی  دیلده سنین تك قوناغــا

گنجئ-لیك گئتدی الیمدن،اوزون ایللر بویودور

آریزولار قــانادیــم  محـرم اولوب تـــؤز-توپراغـا

دالغانین ! خسته وجودی نه سایاق تاب ائله-سین؟

بو قَدَر جور و جفایه ،بیرده دورسون آیاغا!!!!!

دالغالی آراز

اولسادا جانیمـدا مین دردیم  منیم

          دردیمین درمانی ســـنسن وطنیم

قلبیمده مینلرجه عشقیم اولسادا

          عشقیمین عنوانی سنسن وطنیم

سنــینله اولماقا چوخ چالیـــشارام

سنـــسیزلیگینده بیلكی آلیشـارام

خیالینـــــلا گؤلوب من ،دانــیشارام

          سئوگیمین جانانی سنسن وطنیم

یقین بیل یولوندا جــــــــاندان یانارام

عشقیوی اؤزومه بیردوست سانارام

نازینـــــی چـــــــَكَر كَن،دردین آلارام

          قلبیــــــمین افغانی سنسن وطنیم

سنســــیز من، اولارام،دلی-دیوانه

اؤزومـــــــــده،اؤزومه! یاد-ی بیگانه

دؤندرسم اؤزومی، هانسی بیریانه

          روحومون ایمـــانی  سنـسن وطنیم

سینـــــنده آرازام،آشیب داشـــــــارام

عشقیــــــنله دونیادا،بیل-كی یاشارام

فرمــان وئر،باخ گؤر من نئجه جؤشارام

          آرازین توفـــــانی سنــــسن وطنــیــم

سن دوغما یوردومسان آذربایجانیم

دیلیــمده سؤزومسن،داماردا قانیم

عالمده فخریمسن،شهرتیم،شانیم

          دالــــغانین سولــطانی سنسن وطنیم

         دالغالی آراز

سئوگیــــــلیم لبلرین یاقـــوتا بنزر

سراسر دیشـلرین دردانه دن  دیر

صدف دهانیندان چیخان سؤزلرین

هربیــری، بیر غیــر خزانه دن دیر

خومار-خومار  باخماق، گؤز قایداسی دیر

لاله تك  قیــــزارماق، اوز قایداســی دیر

پریشــــانلیــق، زولفون اؤز قایداسی دیر

نه باد صبـــــادن، نه شــــــــــانه دن دیر

موشتاق دیر اووزونه، اوزو واقفین

یولوندا پای انداز اؤزو واقفـــــــین

سن سن فیكری ذیكری،سؤزو واقفین

غیر سؤز یانینـــــــدا افســـانه دن دیر

ملاپناه واقف

صبرایله كؤنول دؤنه-جك روزگاریمیز البت

قراریم قالمادی ساقی

خزان اولدو ، بهاریم قالمادی ساقی

منی بیر نازلی دیلبر عشقی رسوا ائیله دی آخیر

نه بولسون عشقیدن غافیل اولانلار ، اعتیباریم قالمادی ساقی

گوزوم قان آغلیورآنجاق،قلم تصویره چكدیكجه اوجانان وصفینی هردم

بو هیجران دردینی چكمكده آرتیق اختیاریم قالمادی ساقی

منی دردیمله قویدو باش باشا بیر گون او جانانیم

چكیب گئتدی ، نگاریم قالمادی ساقی

ووقاریم قالمادی ساقی

سالك تبریزی

گؤردۆم اۏل خورشید حُسنۆن، اختیارېم قالمادې،

سایه تك بیر یئرده دورماغا قرارېم قالمادې.

بیرگۆن اۏلماز طلعتین گؤرمك میسّر، آه آیم،

ذرّه جه اۏل گۆل یانېندا اعتبارېم قالمادی

پاك قېلدې ضعف، تندن لوح دهر آیین هسین،

اؤیله محو اۏلدوم آی بیر ذرّه غبارېم قالمادې.

غم گۆنۆ همدملریم غرق اۏلدولار گؤز یاشېنا،

سیلمڲه گؤز یاشېمې بیر غمگسارېم قالمادې

روزگارېم خوش آئچیردی آه آیم دُوران دؤنۆب،

اۏلدو احوالېم خراب روزگارېم قالمادې.

راه عشق ایچره بنا آنجاق فنا مقصود ایدی،

شُكر آیم مقصودا یئتدیم، انتظارېم قالمادې.

ای فضولی! ائل قامی اغیارېم اۏلدو یار اۆچۆن،

سوز دلدن غِیری بیر،دلسوز یارېم قالمادې.

فضــولی

ائلیمین گوللری سولمایان كیمی

دریالار  اوسگویه دولمایان كیمی

توتولوب اولمایان كیمی

اوچماقدیر دیلگیم قانات وئر منه

غم توزون آپارمیر گؤزومون سئلی

سوسدوروب دیلیمی ننه لیك فئلی

دردیمی توكنمز حیات وئر منه

چال سازی ، سسینده سؤزومو دئییم

قال رنگین گؤسترمز دونومو گئییم

واردیر چارپیشماغا  هله لیك هئییم

گئدیرم چنلی یول، قیرآت وئر منه

جانیملا وارلیغیم، واریم دیدیشیر

اوخ قالیب سوموكده  یارا بیتیشیر

حیاتیم بوش-بوشا  باشا یئتیشیر

بوسون گونلریمده ثبات وئرمنه

قولوما قارداشدان دایاق ایستیرم

دیلیمه ائلیمدن سایاق ایستیرم

دنیزلر توتوملو  چاناق ایستیرم

دردیمی یازماغا داوات وئر منه

سحرخانیم

اگر سندن دؤنر ایسم،نصیبیم آه وزار اولسون!

باهاریم قار تؤكن قیشلار،آچیلماز بیر دیار اولسون!

چمنزاریم،باغیم-باغچام سارالسین،هپسی خار اولسون!

مزاریم اود توتوب یانسین، بوعشقیم آشیكار اولسون!

سوس،ای بولبول،كس ای طوفان،مرامیم استراحت دیر،

بو یئرلرده پاییم یوخموش،علاجیم بیر سیاحت دیر؛

اؤلوم!... ای واه، اونعمت دیر،او بیر شانلی سعادت دیر.

اگر واخت سیز اؤلر ایسم رقیبیم بختیار اولسون!

فلكدن انتقام ایستر،قوپوب روحومدا طوفانلار،

نه انصاف سیز،نه وجدان سیز اولورموش،یارب،انسانلار!

یاز ای وورغون،چاغیر قوپسون بوگون عالمده طوفانلار،

داغیلسین محوری-عالم كؤكوندن تار ومار اولسون!

صمد وورغون

قیلدی عشق ای خون دل! كویوندا چۏخ رسوا منی،

بیر گئییم گئیدیر تانېماسېنلار هئچ اۏردا منی

هم نشینیم بسدی كویوندا اۏلوبدور ایت رقیب،

آهیم اۏدو، یا اۏنو اؤلدورمه لیدیر یا منی.

منزلیم چئوریلدی گۆلخن اۏلدو گۆل یۆزدن ایراق،

عاقبت توپراغا سالدېردې یامان سودا منی.

قتلیمه وعده وئریب، ائتمیر وفا بیر اۏ پری،

بو تغافل اؤلدۆرۆر بو گۆن و یا فردا منی