ای ملك سیما كه سندن ئوزگه حیراندر سنه

حق بیلیر انسان دئمه ز هر كیم كه انساندر سنه



وئرمییه ن جانین سنه بیلمه ز حیات جاویدان

 زنده و جاوید اونا دئرلر كه قرباندر سنه



عالمی پروانه شمع جمالین قیلدی عشق

جان عالمسن فدا هر لحظه مین جاندرسنه



عاشقه شوقینله جان وئرمك ایكن مشكل دگیل

 چون مسیحی وقتسن جان وئرمك آساندر سنه



چخسا یاریم گئجه لر اغیار طعنیندن ساقیا

 سن مهی اوج ملاحتسن بو نقصاندر سنه



پادشاهیم ظلم ائدیپ عاشق سنه ظالم دئمیش

 خوبرو لردن یامان گلمه ز بو بهتاندر سنه



ای فضولی خوبرو لردن تغافلدر یامان

 گر جفا هم گلسه اونلاردان بیر احساندر سنه

فضولی

اگر قویسان باخام من بیر نظر اول چشم شهلایه،

گؤزوم چیخسین اگر من بیر ده باخسام جام مینایه

جانیمی یاندیردی شوقون ای نگاریم هارداسان
گوزلریم نوری ایكی عالمده یاریم هارداسان
باغریمی قان ایلدی آجی فراقون گل ایرش
ای لبون وصلی شراب خوشگواریم هارداسان
فرقتون دردی منی گور كی نه مجروح ایله دی
ای گوزی نرگس حبیب گولعذاریم هارداسان
صبری یغمالدی شوقون قراریم قالمادی
ای منیم آرام صبریم بی قراریم هارداسان
ایله دی عشقون منی قلخان ملك تیرینه
ای گوزی قاشی بیلیك لی شهریاریم هارداسان
تا اوزون شوقوندان ایراغ اولموشام پروانه تك
یانیرام لیل و نهار ای نور و ناریم هارداسان
قاتی موشتاق اولموشام زلف و غذارین بویونا
ای اوزی گلشن ساچی مشك تاتاریم هارداسان
سندن آیری كونلومه یوخدور وفالی یار دوست
ای جفاسیز حسن كامل یار غاریم هارداسان
هجرون اوخی دلدی بو شوقونده یانان باغریمی
صورت و معنیده ای چابك سواریم هارداسان
بادایلن گوندر ساچین بویین منه هر صبحدم
ای كی یاندیم گئچدی حددن انتظاریم هارداسان
یار اوچون هر گوشه ده مین دیو اولور دشمن منه
ای سواد اعظم و محكم حصاریم هارداسان
عاشیقین جنات عدنی چون جمالون وصلیدیر
ای شراب كوثریم گئتمز خماریم هارداسان
چون نسیمی دور بوگون ایام عشقین خسروی
ای شكر لــب یار شیرین روزگاریم هارداسان

نسیمی

شاطر اوغلان گوروم آللاه سنه وئرسین بركت

قوی اونون یاخشی النسین ،خمیرین اللنسین

چوخ پیشیر یاخشی پیشیر گویده قیریلدات كوره یی

منبر اوسته چوره یین قوی قالانیب تللنسین

تندیرین طور تكین عرشیده ن آلسین ایشیغی

ارسینین بیرق احرار كیمی میللنسین

كاسیبین قیسمتی یوخ یاغلی پیلوو دوشله ماغا

بو یاوان سنگه یی بیرقوی ساحالیب سئللنسین

قیرتین قوربانی سن موشترینی تئز یولا سال

ائل ایچینده یاراماز آرواد اوشاغ وئللنسین

قوی ایكیریاللیغی ساتسین خوزه ئین بیر ماناتا

دیشی دوشموش قوجانین آغزی نه دیر دیللنسین

او منیم شعریمه چوخ ماییل اولان وردسته

دئنه: شاعیر چوره یی قوی قوروسون گوللنسین

من لیغیرسا یئیه بیلسم ده فلوس لازیم اولار

بو سوسوز باخچا نه لازیم بو قده ربئللنسین

ساری یازلیقدان اولان گوللی قیزارمیش سنگك

گره ك آغزوندا اریك تك ازیلیب هللنسین

تهرانین غیرتی یوخ شهریار ساخلاماغا

قاچمشام تربیزه تا یاخشی یامان بللنسین

باغچامیز فاسد اولوب ، هر نه ااكرسن اولماز

یئری داشلیقدی گره ك توپراقی غربیللنسین

مدعاسی چوخ اولان طبل تهی پربادوخ

نیله یك ضرناچی نین بورنو گره ك یئلله نسین

بو گیجللنمه دن آی چرخ فلك سنده یورول

بو حیاسیز گونه گوزلر نه قده ر زیللنسین

سعدی نین باغ گلستانی گره ك حشره قده ر

آلماسی سلله لنیب خرماسی زنبیللنسین

لعنت اول باد خزانه كی “نظامی ” باغینین

بیر یاوا گلبسرین قویمادی كاكللنسین

آرزو جلگه لرینده بیز اكن مزرعه لر

دئییه سن ساقه لنیب قوی هله سنبللنسین

قصه چوخ قافیه یوخ آختاریرام تاپمیورام

یئریدیر شهریارین طبعی ده تنبللنسین

شهریار

فضولی دن مزاجېن منحرف گؤردۆم بوگۆن یارېن،

مگر فرصت بولوب، بیر شمّه حالېندان بیان ائتمیش.

فضولی

تركی بیر چشمه ایسه، من اونی دریا ائله دیم
بیر سویرق معركه نی محشر كبرا ائله دیم
بیر ایشیلتیدی سها اولدوزی تك گورسنمز
گوز یاشیلما من اونی عقد ثریا ائله دیم
امیدیم وار كه بو دریا هله اقیانوس اولا
اونا ضامن بو زمینه كه مهیا ائله دیم
عرفانا چاتماسا شعر و ادب ابقا اولماز
من ده عرفانه چاتیب شعریمی ابقا ائله دیم
ابدیتله یاناشدیم دوغولا حافظه تای
شیرازین شاهچراغین تبریزه اهدا ائله دیم
تركی نین جانینی آلمیشدی حیاسیز طاغوت
من حیات آلدیم اونا، حق اوچون احیا ائله دیم
فیض روح القدس  اولدی مددیم حافظ تك
من ده حافظ كیمی اعجاز مسیحا ائله دیم
قمه قداره لر آغزیندا دیل اولمیشدی سوگوش
من سه وینج ائتدیم اونی، خنجری خرما ائله دیم
ایندی گویلرده گوزل صفله صفا ایله گزیر
منجلابلاردا اوزن اردگی دورنا ائله دیم
باخ كه(حیدر بابا)افسانه تك اولموش بیر قاف
من كیچیك بیر داغی سر منزل عنقا ائله دیم
بوردا(روشن ضمیرین)ده هنرین یاد ائده لیم
من اون دا قلمین طوطی گویا ائله دیم
نه تك ایراندا منیم ولوله سالمیش قلمیم
باخ كه تركیه ده، قافقازدا نه غوغا ائله دیم
باخ كه تهراندا نه شاعرلری شیدا ائله دیم
هم(سهندیه) سهندین داغین ائتدی باش اوجا
هممن ئوز قارداشیمین حقینی ایفا ائله دیم
آجی دیللرده شیرین تركی اولوردی حنظل
من شیرین دیللره قاتدیم اونی حلوا ائله دیم
هر نه قالمیشدی كئچنلردن اونا بال پتگی
اریدیب موملو بالین شهد مصفا ائله دیم
تركی، واللاه، آنالار اوخشاغی، لایلای دیلی دیر
دردیمی من بو دوا ایله مداوا ائله دیم
شهریار، حیف ساووخدیر بو دگیرمان هله ده
دارتماغا یوخدی دنی، من ده مدارا ائله دیم

شهریار

فــراقی چكمه ین عاشیـق، وصالین قدرینی بیلمز
جـمیله اولـمایان واصیل،جـمالین قدرینی بیلمز

شـب اسراده قوسینین ایكی نصف ائیله دی آیی
بو معجزدن اولان غافیل، هلالین قدرینی بیلمز

دوداغین سلسبیلیندن خبـردار اولـمایان جانسیز
اونون ماهییتی اود دور، زلالین قدرینی بیلــمز

مــدور نقــطه ی خالون، ببك دن عینیــنه قوندی
ببك سیز قالسین اول گوزكی بوخالین قدرینی بیلمز

نهالون اعتدالیندان، اوتانار سدره و طوبی
بو قدی بنزه دن سروه،نهالین قدرینی بیلمز

سنی سنـدن دیلر كونلوم، نه دونیـانین زر وگنجین
كی اول مالی سئون جانسیز، بومالین قدرینی بیلمز

اوزوندور پرده آللاهین یمینی، كعبه سی، بیتی
یمینی بیلممیش هر كیم شـمالین قدرینی بیلمز

گونش ماه تـمامیندن زواله اوغراشور هر گون
نه دن شول آفتابی بی زوالین قدرینی بیـلمز

لب لعلون وصالیندان جدا اولـماق منه دوشــــمز
بو ذوقی بیلمه ین صوفی، بو حالین قدرینی بیلمز

نســــــیمی صوفی دگیشمز غموندن گئیدیگی شالی
كی اول صوفی صفاسیزدور بو شالین قدرینی بیلمز

نسیمی

سعی ائیله دیم افسونیله، پونهان قیلام من دردیمی
پونهان ایشیم چیخدی اوزه، سئیلیله قانیمدیر گئدن

قالدیم بئله زار و ذلیل، بیچاره یم قلبیم علیل
دوشدوم او دیلداردان اوزاق، آسوده یاریمدیر گئدن

یوخ عهدینین بونیادی هئچ، بیتمز اونون بیدادی هئچ
چیخماز كونولدن یادی هئچ، ان خوش زمانیمدیر گئدن

بیر آن دایان ای ساریبان، قویما گئده بو كاروان
اول سروه اویموشدور كونول، سروی روانیمدیر گئدن

بیر دون گئری ای نازنین، گؤز مسكنین اولسون سنین
سن سیز بو سونسوز گویلره، آه و فغانیمدیر گئدن

جان ترك ائدنده جیسمینی، اینسان آچار اوز حیسسینی
یوخدی سوزون گورموش گوزوم، بو خسته جانیمدیر گئدن

سعدی سنه لایق دئیل، یاردان گیلئی ای بیوفا
چوخ گوردوم اوندان من جفا، صبر و توانیم دیر گئدن

سعدی

او قارا زولف كی هردم دولاشیر شانه لره

گوستریر عشق كمندین دل دیوانه لره

مهر رخسارینی مندن كسوب اول ماه تمام

دوشدی فرصت یئنه بوندان بئله بیگانه لره

یوخسا ائی گول بوقده ر باده ناب ایچمزیدیم

شوق لعلین منی جلب ائیله دی مئیخانه لره

قانا دونسون گوروم او باده گولگون سنسیز

بیرده گر رغبت ائدیم ساغر وپیمانه لره

حسرت چشم خمارین لب لعلین هوسی

گوستریر گوشه مئیخانه نی مستانه لره

شوق رخسارین ایله اودلارا یانمیش كونلوم

اویره دوب  شمعده یانماقلیغی پروانه لره

جورین آز ائت منه قورخوم بودو بیر آه چكیم

بیر یانا اود دوشه باشدان-باشا كاشانه لره

واحیدم شاعر آزاده پرستم نه غمـــــــیم

قیلماسام رغبت اگر مسجده بتخانه لره

علی آقاواحید

توركون دیلی تك سئوگلی ایستكلی دیل اولماز
ئوزگه دیله قاتسان , بو اصیل دیل, اصیل اولماز

ئوز شعرینی فارسا- عربه قاتماسا شاعر
شعری اوخویانلار. ائشیدنلر كسیل اولماز

فارس شاعری چوخ سوزلرینی بیزدن آپارمیش
صابر كیمی بیر سفره لی شاعیر, پخیل اولماز

توركون مثلی فولكلوری دنیادا تك دیر
خان یورقانی, كند ایچره مثل دیر, میتیل اولماز

آذر قوشونی, قیصر رومی اسیر ائتمیش
كسری سوزودیر بیر بئله تاریخ ناغیل اولماز

پیشمیش كیمی, شعرین ده گرگ داد" دوزی اولسون
كند اهلی بیلرلركی   دوشابسیز خشیل اولماز

سوزلرده جواهر كیمی دیر,اصلی بدلدن
تشخیص وئرن اولسا بو قده ر زیر- زیبیل اولماز

شاعیر اولا بیلمزسن, آنان دوغماسا شاعیر
مس سن, آبالام هر سارای كوینك قیزیل اولماز

چوخ قیسا بوی اولسان اولوسان جین كیمی شیطان
چوخ دا اوزون اولما كه اوزوندا عقیل اولماز

مندن ده نه ظالم چیخار,اوغلوم, نه قصاص چی
بیر دفعه بونی قان كی ایپكدن قیزیل اولماز

آزاد قوی اوغول عشقی طبیعتده بولونسون
داغ , داشدا دوغولموش ده لی جیران حمیل اولماز

اینسان اودی توتسون بو ذلیل خلقین الیندن
آلاهی سورسن , بئله اینسان ذلیل اولماز

چوق داكی سرابون سویی وار یاغ- بالی واردیر
باش عرشه ده چاتدیرسا , سراب اردبیل اولماز

میلت غمی اولسا , بو جوجوقلار چوپه دونمز
اربابلار یمیزدان قارینلار طبیل اولماز

دوز واختا دولار تاختا, طاباق ادویه ایله
اوندا كی ننه م سانجیلانارزنجفیل اولماز

بو شهریار ین طبعی كیمی چیممه لی چشمه
كوثر اولا بیلسه دئمیرم , سلسبیل اولماز

شهریار