عشقین ائیله سه عالمی قان بیلمه‌یه جكسن
یوز دفعه دئسه‌م، مطلبی قان، بیلمه‌یه جكسن
باخ سینه مه، مین یاره ووروب تیرِ نگاهین
افسوس كی، ای قاشی كمان، بیلمه‌یه جكسن
آخر كی قوجالتدی منی، درِد و غم عشقین
پیر اولماسان، ای تازه جوان، بیلمه‌یه جكسن
بی‌مهرسن، عالمده، رُخِ آلینا حسرت
وئرسه‌م‌ده اگر هیجرده جان، بیلمه‌یه جكسن
مجنون كیمی، زنجیرِ سرِ زولفینه باغلی
اولسام داخی، رسوای جهان، بیلمه‌یه جكسن
توتسام، گؤزه‌لیم، دامنینی، اینجیمه منده‌ن
نیلیم كی، دئسم گئتمه، دایان، بیلمه‌یه جكسن
كویوندا گؤزوم یاشینی، یوز یول ستمیندن
ائتسه‌م یوزه، ای سرو روان، بیلمه‌یه جكسن
سرّ لبینی دیلده نهان ساخلادیم ائلدن
فاش اولمایا، بو رازِ نهان، بیلمه‌یه جكسن
شؤق دهنین واحیدی محو ائیله‌سه هر گاه
اوندان یئنه بیر نام نشان، بیلمه‌یه جكسن
علی آقا واحید
يازينين قالاني
