بو گئجه کونلوم ایله، ایسته دی تاریم دانیشا

میضرابیم بیر نئچه ایلدن سونرا منله باریشا

غم هیجرانین الیندن ، سوکولن پرده لرین

چکه یایدان آتیلان اوخلا،گله بیر یاریشا

یاکی آرام آلاجاقدیر اورگیم بیر نئچه آن

یادا، اتش سالاجاق کهنه کوزوم، جان آلیشا

سیل اشکیم آخاراق ایسلاداجاقدیر واراقی

قورخورام صوبحه قدر ،هرنه کی یازدیم قاریشا

" دالغالی اراز "

 گئجه لر سندن اوزاق ،قول بویونام من غم_ایله

نه بیلیرسن کی!!! دولوب زولف سیاهیم دن_ایله

یوخلوقوندا کئچیری حسرتیلن لحظه لریم

سانکی چیخمیشسا جانیم،آیری دوشوبدور تن_ایله

محو ائدیب هانسی دومانلار سنی مندن گوزلیم

آختاریر ایندی سنی ،داغدا خیالیم چن_ایله

منیلن غم_کدری تئز تانیش ائتدین،ده گوروم؟!

بلکه سن قورشالادین تا کوسه شادلیق من_ایله!؟

شکلیوی چکمک اوچون ،هولاییرام گوزگولری

وئرسه فورصت ،یئنه گر، دولماسا گوزلر نم_ایله

اوت توتوب یانمالیدیر،آهیم ایله تون گئجه لر

نفس آلدیقجا سینم قور ایله ییر، هردم_ایله

"آرازین دالغالانیب" حالی یاماندیر گوزلیم

گل کی گلسن! یاشار عومرون قالانین ،تک سن_ایله

"دالغالی آراز "

ا

دیل آچاندان آنامیــــن هر سؤزونه جان دئمیشم

بو عــــــزیز توپراغیـــــما آذربایــــــــجان دئمیشم

من كی بولبـول دئییلم هر چیچگه عاشیق اولام

بیر یانار عشقـــــیله اؤز یوردوما جانان دئمیشــم

سئویرم توپراغیـــــمی ، خلقیمی من بیر آنا تك

ائلینی سئـــومیه-نه نانكور نادان دئمیـــــشم !

...

قلبیم ده سنین  منده سنین  جان دا سنین دیر

ییخسان   داغیدیب   محمو ائدیب   آتسان دا سنین دیر

گوندوزلری هیجرانینا  یوخ تابی-توانیم

هیجران گئجه سینده نه جفا چكمه دی جانیم!

سن گول منه  گول! گول  بوحیاتین اوءزو گولسون

بال شهدی-لبیندن سوزولوب شعره توءكولسون

آچ زولفونو قوی دان یئری چوءهره نده  سوءكولسون

قوربان دیله سین  جان دیله سین  جان دا سنین دیر

محمدسعیداردوبادی

 *عاشیق اولدوز

جانیم سنین ولی ای گول ایمانیمی قایتار

ایماندا سنین قلب پریشانیمی قایتار

گوز یاشیمی توكدوم گئجه گوندوز سنه خاطیر

گوز یاشدا سنین دیده ی گیریانیمی قایتار

رسمیدی كی قوربان پایینی قایتاران اولماز

سیندیر بو قوجا رسمینی قوربانیمی قایتار

من ایستدیم كاخ سلیمان منیم  اولسون

كاخلاردا سنین كلبه ی ویرانیمی قایتار

ای ساریبان آهسته گئت، آرام جانیمدیر گئدن
یار كونلومو چكمیش منیم، روح و روانیمدیر گئدن