|
فلیین بیر بئله دؤورو اولاجاغمش، نه بیلیم؟
سارالیب، باغ و گولوستان سولاجاغمش، نه بیلیم؟
بیتیریب، باغ سالیب، بیر نئچه گوللر یئتیردیم،
اوزادیب دست قضا كیم یولاجاغمش، نه بیلیم؟
اورییم یاره لنیب، سینه مه داغلار چكیلیب،
گؤزومه قان ساغیلیب، یاش دولاجاغمش، نه بیلیم؟
ال چكیب ناكسدن، چرخ اؤزو ناكسیمیش،
تك بانا جور و جفالار قیلاجاغمش، نه بیلیم؟
بسلدیم زلفو، دئدیم، باشیما سالسین سایه،
دولانیب بوینا ایلان تك چالاجاغمش، نه بیلیم؟
عاشیقه ناز ائله مك عادت اولوب معشوقه،
بو قدر ناز ائله ییب جان آلاجاغمش، نه بیلیم؟
سلطنت رتبه سینه ناز قیلاردیم شاه ایكن،
منی باشدان-آیاغا غم ساراجاغمش، نه بیلیم؟
دولانیب روزگارین حالتی بیر اؤزگه حالا،
ای قاراداغی، سانا غم قالاجاغمش، نه بیلیم؟
قاراداغی
|
