خلقیمه یالان سئوز ساتا بیلمه رم

ائلی كفسیز گورسه م قلبیم اوتلانار

نه گنجه  نه گوندوز یاتا بیلمه رم

ائلدن آیری دوشسم بئلیم بوكوله ر

قاش كیپریك آغارار  دیشلر توكوله ر

تملدن كونلومون ائوی سوكوله ر

بوشانلی ائلیمی آتا بیلمه رم

هركیم خائین اولسا ائله حاق ایه ر

بیرمثل وار: اوخی تئز داشا دیه ر

طبعیم دریاكیمی جوشماسا ایه ر

یازسامدا مطلبه چاتا بیلمه رم

"نصیری " یه م دایاق اولسا ائل منه

باتانماز آجیقلی طوفان  سئل منه

هردیلدن شیریندی دوغما دیل منه

آیری دیل دیلیمه قاتا بیلمه رم

تبریز / ولی نصیری

رحم قیل  قوی اولونا دردیمه بیر چاره منیم

سالما چوخ لیلی تك ائوز قیثینی آواره چئوله

راضی اولما كی دگه ال آیاغیم خاره منیم

اوت توتوب اوتلانارام تركیمی قیلسام وطنیم

چكمه یاد ئولكیه جسمیم یانا بس ناره منیم

گل گیلن عاشیقینی ائتمه دیگرگین بوقدر

قوی بیلین سین كی اولوبدور مكانیم هاره منیم

دئمه یوخدور دوءزوموم  جور و جفایه  گوزلیم

بیلیرم تانری یازیب طالعیمی قاره منیم

قورخورام عمر " نصیری "  گئده بر باده آخیر

یئتمه میشدن الیم هئچ سن كیمی بیر یاره منیم

تبریز" ولی نصیری

دردلینین دردینی قانیرام ایندی

یاخشی  یامانی  عیرینی  دوءزو

بیربیریندن سئچیب تانیرام ایندی

هركیم كی ایستینی سویوقی بیلمیر

ائل ایله آغلامیر  ائل ایله گولمور

كوءدورت توزونو قلبیندن سیلمیر

بئله بد عمله یانیرام ایندی

خلقیمین یولوندا بویانسام قانا

یئنه سیر وئرمه رم یاغی دوشمانا

بو شعری سویله دیم یابانجی قانا

بیله كی بیر سوءزو دانیرام ایندی

" نصیری " آچاندان بصیرت گوءزون

ائلینه سویله ئیب ائوز ائورك سوءزون

هركس ئیكی دوتور خلقیندن اوءزون

نادان جرگه سینده سانیرام ایندی 

 تبریز / ولی نصیری

بیلمه دین بیر گونده وار سنه اولوم؟

الیندن گلنی خیانت ائتدین

دئدین كی قالاجاق كلگیم فئلیم

نه یامان قان تئوكدون  ائیلدین طغیان

انصافسیز  سانمادین یازیقدیر  اینسان

سئویله دین قئوی ائدیم بلالی طوفان

ائولكه نی داغیتسا داغیتسین یئلیم

نه قدر یالتاقی قاندیردین آنجاق

حقیقتی دانیب داندیردین آنجاق

مینلرجه كتابی یاندیردین آنجاق

یئنه ده تاریخدن سیلینمز دیلیم

قازت لر قاپیسین چكیب باغلادین

" نصیری " خلقینین قلبین داغلادین

شاهلیقین قورتاردی سنده آغلادین

اوندا گئوردوم شئنلیك ائدیر بو ائلیم

تبریز " ولی نصیری