شله لرآلتیندا بوكولوب بئللر

ظلمت پنجه سینده سیخیلیب ائللر 

سازلاری توزباسیب قیریلیب تئللر

سازایندی نه چالسین ؟نه ساز اینجئیب

تپیلیب قولاغلار یومولوب گوزلر

بوش یئره سوورولوربوش یئره  سوزلر

او.كاردان. بوكوردان كیم امید گوزلر ؟

هارای سسله مكدن بوقاز اینجیئب 

آلنینی داغلایئر پینه باغلاسین

خلوتده اوینایئر اوزده آغلاسین

شرفین آیاقلیر بئقین یاغلاسین

بوآلاسققلدن ناماز اینجیئب 

نه الده توتوم وارنه دیزده دایاق

یوك باسیر بئلیندن تیتره یئر آیاق

بیر كیشی گورمورم قدیمكی سایاق

اوتایدان بوتایدان آراز اینجیئب   

بایئندیر نصبدن بونه نسیلدی

اومیدلر سیزیئدی اودا .كسیلدی

نرله ری باسدیلار لوك لر ازیلدی

كوپانسیز كوششكدن جاهاز اینجیئب 

بیرفقط شاعیئردی سوزونو یازیر

ائله بیل اینه ینن قویونو قازیر

گاه چاشیر یولوندان گاه ایتیر آزیر

نه قیشدا پایئزدا نه یاز اینجیئب

قان سوران . سورماقدان . بیرمگردویور

پام میقلاباش كسیر.  درینی سویور

دوزیولون بناسین ائیریدن قویور

ناتاراز الیندن تاراز اینجیئب  

هوشنگ جعفری

باخدیم دالیسیجا یار گئدنده

بیر یولدا دئدیم باخار گئدنده

باخدی قاپیدان گئچنده گولدو

بیلمیردی اوره‌ك‌ اومار گئدنده

باغلاندی دیلیم اوره‌كدن آمما

آز قالدی چئكم هاوار گئدنده

گئتمه ، گئدیسن ؟ یاواش یاواش گئت

جانیم بیلیسن چیخار گئدنده

دوندر گؤزونو ، خومار خومار باخ

قویما منی ده ، خومار گئدنده

سن سیزلیگه دؤزمه‌گیم چتیندی

گل جانیمی آل قوتار گئدنده

سندن سورا عشقی نئیلیرم من

آل عشقینیده آپار گئدنده

مهر ایله نوازش ائیله بلكه

گول بیتسین اوره‌كده ، قار گئدنده

من گؤر نه دئییردیم اؤز اؤزمولن

قول بوینوما بیر سالار گئدنده

بیچاره اوره‌ك بولود كیمین دیر

گؤردوكجه سنی دولار گئدنده

دای « جعفری » بسدی شعر یازماق

سندنده بیر آد قالار گئدنده

كیم چئگنینه آلدی سالدی خلعت

سؤز اوستادی ، شهریار گئدنده

هوشنگ جعفری

یارین بوینون قوجاقلادیم ، یار آغلادی من آغلادیم

آغ آتیم ، قول قاناتیم ،
آت قدمین یورتمه یئری !
آش تپه لردن
سیلدیریم تك سره لردن
سئله سینمیش دره لردن
بو نه طوفاندی گؤزل كهلیگیمی ایستیر آییرسین فره لردن
غیرتیم جوشه گلیر غملی خبردن
آغ آتیم – قورخما خطردن !
آغ آتیم قول ، قاناتیم ،
شیهه چك ، قوی سسیوه
بلكه یاتانلاردا اؤیانسین
یاتماغین واختی دگیل دورسون اوتانسین
یاتانین عؤمرو تالانسین
تازا نعلین وار آتیم
چال بو داغین سینه سینه ، قوی پارالانسین
چال داغین سینه سی باتسین ، یارالانسین
داشی داشدان ، آرالانسین
آغ آتیم قول قاناتیم
داش قایادان آشما چتیندی
قاباق اؤز یوققوشادی ، قاشما چتیندی
داغا دیرماشما چتیندی
داشا ، سووخاشما چتیندی
باخما یوللاری چتیندی ، اورانین هیبتی یوخدور
آغ آتیم همت ائله !
غیرتی یوخدور
هله اؤز یوققوشالار چوخدو قاباقدا
آشماق اولماز بو آیاقدا
آغ آتیم قول قاناتیم
بسدس ایاق ساخلاما ، گون باتدی قارالدی
گون گئچیب داغ دالینا رنگی سارالدی
داغین اوستون دومان آلدی
آغ آتیم ، بس بو نه حالدی؟
بورا یارقاندی  آتیم دورما آماندی ….
آغ آتیم ، قول قاناتیم
آت قدم آیدینلیغا ساری
هؤركوشن  اوولاریلان  ؛ چیخ سره یاللاری یوخاری
قار قالان داغلارا سال بیر نفسین
قوی اریسین بوز كیمی چئگینینده كی قاری
سولاری آرخلارا سال بلكه سووارسین
قوری قالمیش مومالاری
قوی بؤیوك گولده اؤزوشسونله یاشیل باش سونالاری
آغ آتیم
جهد ائله باری
سنی تاری !
آغ آتیم ، قول قاناتیم
طبعیمین دریاسی جوشقوندو
یئل اسدیر لپه لنسین
قوی چالیم صخره لره دالغامی ، دالغام سپه لنسین
قوی یاغیش تك قورویان
داغلارین اؤستونده اله نسین
هرزه اوتلاری آپارسین
لالا بیتسین
هامی گؤللر تزه لنسین
گؤلو بلبل یییه لنسین
آغ آتیم ، قول قاناتیم
آت قدمین قلعه ی بابكدن آشاق
قارا گؤنلن ساواشاق
آت گؤلوندن سس آتیب ، بابكین حالین سوروشاق
یئنه طوفاندا جوشاق
دریالار تك قوووشاق
آغ آتیم ، قول قاناتیم
شیهه چك قوی سسیوه
هاجرینی تركینه چكسین نبی گلسین
قوی كور اوغلو آتینی داغلارا سالسین
ائشیدیب شیهه نی گلسین
الده كسگین قیلیجیلا
بویاسین قانه كئچل حمزه نی گلسین
قوی كرم سازینی سالسین دؤشونه ، چؤللره دؤشسون
های سسی ائللره دؤشسون
دئگیلن غملی كرم ایستر اگر ، اصلینی گلسین
دشمنین بلكه كسك نسلینی ، گلسین
قوی بو داغلاردا بؤیوك هلهله دؤشسون
داغلارا ولوله دؤشسون !
آغ آتیم ، قول قاناتیم
منه بیر قالغی بابامدان ، بو ورندیلدی ، بونو چئگنیمه ساللام
قاراداغ باشینی آللام
اورا بیر ولوله ساللام
آغ آتیم دورما ، یوبانسان ، دالی قاللام
آغ آتیم ، قول قاناتیم
بیز اگر قلعه ی سیمرغدان آشساق بیزه آزدی
باخما یوللار ناتارازدی
باخما بو قارلی دماوند ، بو قفقاز بو هرازدی
باخما داغدا هاوا دوتقوندو – آیازدی
باخما بو قیشدی بو یازدی
آغ آتیم آت قدمین دریا ، دایازدی
دریانی گئچسن اگر شهرِ نیازدی
اوردا هر قان كی تؤكولدو یئره ، آزادلیقی یازدی
بشر آزادلیغا بازدی !
آغ آتیم ، قول قاناتیم
اوردا دؤلبرچین اوتو دؤرت پَر آچیبدی
اوردا دیللنمگه دیل تازه شیرین دیللر آچیبدی
اوردا باغلاردا بوتون گؤل لر آچیبدی
آغ آتیم
آت قدم
آیدینلیغا ساری !