باش آچمادیم بو دونیانین ایشیندن
خئیری آزالیب، شری چوخالیر
قیمتلیلر دوءشورلر قیمتیندن
گؤن قیمته مینیر، دری چوخالیر
ائله بیل غم یاغیب قایایا- داغا
كؤنوللر حسرتدیر، وصال تاپماغا
عالملر- عاقللر گلمیر قاباغا
باشدان-خاراب آرتیب، دلی چوخالیر
انسانی یاشادار، دایم آرزولار
آرزوسوز، حیاتین نه معناسی وار
گؤرموشوك خانیمین بیر اری اولار
بعضی خانیملارین اری چوخالیر
چوخلاری بو شعری چتین كی، قانا
قانان دا قورخورام چئویره، دانا
منیم یازیغیم گلیر آذربایجانا
قانینی سوووران زلی چوخالیر
هر شئیین قیمتین اوءستونه یازین
نه فرقی دمیرین، گوءموشون، آلمیزین
سندن سوروشسالار دئ كی، عیواضین
قالا آلتیندا درد- سری چوخالیر
یتیم عیواض
