تركی بیر چشمه ایسه، من اونی دریا ائله دیم
بیر سویرق معركه نی محشر كبرا ائله دیم
بیر ایشیلتیدی سها اولدوزی تك گورسنمز
گوز یاشیلما من اونی عقد ثریا ائله دیم
امیدیم وار كه بو دریا هله اقیانوس اولا
اونا ضامن بو زمینه كه مهیا ائله دیم
عرفانا چاتماسا شعر و ادب ابقا اولماز
من ده عرفانه چاتیب شعریمی ابقا ائله دیم
ابدیتله یاناشدیم دوغولا حافظه تای
شیرازین شاهچراغین تبریزه اهدا ائله دیم
تركی نین جانینی آلمیشدی حیاسیز طاغوت
من حیات آلدیم اونا، حق اوچون احیا ائله دیم
فیض روح القدس  اولدی مددیم حافظ تك
من ده حافظ كیمی اعجاز مسیحا ائله دیم
قمه قداره لر آغزیندا دیل اولمیشدی سوگوش
من سه وینج ائتدیم اونی، خنجری خرما ائله دیم
ایندی گویلرده گوزل صفله صفا ایله گزیر
منجلابلاردا اوزن اردگی دورنا ائله دیم
باخ كه(حیدر بابا)افسانه تك اولموش بیر قاف
من كیچیك بیر داغی سر منزل عنقا ائله دیم
بوردا(روشن ضمیرین)ده هنرین یاد ائده لیم
من اون دا قلمین طوطی گویا ائله دیم
نه تك ایراندا منیم ولوله سالمیش قلمیم
باخ كه تركیه ده، قافقازدا نه غوغا ائله دیم
باخ كه تهراندا نه شاعرلری شیدا ائله دیم
هم(سهندیه) سهندین داغین ائتدی باش اوجا
هممن ئوز قارداشیمین حقینی ایفا ائله دیم
آجی دیللرده شیرین تركی اولوردی حنظل
من شیرین دیللره قاتدیم اونی حلوا ائله دیم
هر نه قالمیشدی كئچنلردن اونا بال پتگی
اریدیب موملو بالین شهد مصفا ائله دیم
تركی، واللاه، آنالار اوخشاغی، لایلای دیلی دیر
دردیمی من بو دوا ایله مداوا ائله دیم
شهریار، حیف ساووخدیر بو دگیرمان هله ده
دارتماغا یوخدی دنی، من ده مدارا ائله دیم

شهریار

توركون دیلی تك سئوگلی ایستكلی دیل اولماز
ئوزگه دیله قاتسان , بو اصیل دیل, اصیل اولماز

ئوز شعرینی فارسا- عربه قاتماسا شاعر
شعری اوخویانلار. ائشیدنلر كسیل اولماز

فارس شاعری چوخ سوزلرینی بیزدن آپارمیش
صابر كیمی بیر سفره لی شاعیر, پخیل اولماز

توركون مثلی فولكلوری دنیادا تك دیر
خان یورقانی, كند ایچره مثل دیر, میتیل اولماز

آذر قوشونی, قیصر رومی اسیر ائتمیش
كسری سوزودیر بیر بئله تاریخ ناغیل اولماز

پیشمیش كیمی, شعرین ده گرگ داد" دوزی اولسون
كند اهلی بیلرلركی   دوشابسیز خشیل اولماز

سوزلرده جواهر كیمی دیر,اصلی بدلدن
تشخیص وئرن اولسا بو قده ر زیر- زیبیل اولماز

شاعیر اولا بیلمزسن, آنان دوغماسا شاعیر
مس سن, آبالام هر سارای كوینك قیزیل اولماز

چوخ قیسا بوی اولسان اولوسان جین كیمی شیطان
چوخ دا اوزون اولما كه اوزوندا عقیل اولماز

مندن ده نه ظالم چیخار,اوغلوم, نه قصاص چی
بیر دفعه بونی قان كی ایپكدن قیزیل اولماز

آزاد قوی اوغول عشقی طبیعتده بولونسون
داغ , داشدا دوغولموش ده لی جیران حمیل اولماز

اینسان اودی توتسون بو ذلیل خلقین الیندن
آلاهی سورسن , بئله اینسان ذلیل اولماز

چوق داكی سرابون سویی وار یاغ- بالی واردیر
باش عرشه ده چاتدیرسا , سراب اردبیل اولماز

میلت غمی اولسا , بو جوجوقلار چوپه دونمز
اربابلار یمیزدان قارینلار طبیل اولماز

دوز واختا دولار تاختا, طاباق ادویه ایله
اوندا كی ننه م سانجیلانارزنجفیل اولماز

بو شهریار ین طبعی كیمی چیممه لی چشمه
كوثر اولا بیلسه دئمیرم , سلسبیل اولماز

شهریار

شاه داغیم ،

چال پاپاغیم ،

ائل دایاغیم ،

شانلی سهندیم

باشی طوفانلی سهندیم

باشدا حیدر بابا تك قارلا قیروولا قاریشیب سان

سون ایپك تئللی بولودلارلا افقده ساریشیب سان

ساواشاركن باریشیب سان

گویدن الهام آلالی سرری سماواته دئیه رسن

هله آغ كوركی بورون ، یازدا یاشیل دون دا گئیه رسن

قورادان حالوا یئیه رسن

دوشلرونده صونالار سینه سی تك شوخ ممه لرده

نه شیرین چشمه لرین وار

اویاشیل تئللری ، یئل هورمه ده آینالی سحرده

عشوه لی ائشمه لرین وار

قوی یاغیش یاغسادا یا غسین

سئل اولوب آخسادا آخسین

یانلاروندا دره لر وار

 سانكی خوروزون سون بانی خنجردی سوخولدی
سینه مده اورك وارسا كسیب قیردی داماری
ریشخند له قیر جاندی سحر سویله دی دورما
جان قورخوسی وار عشقین اتوزدون بو قماری
اولدوم قره گون آیریلالی اوساری تئلدن
بو نجا قره گونلردی ایدن رنگیمی ساری
گوز یا شلاری هر یئردن آخارسا منی توشلار
دریا یه باخار بللی دی چایلارین آخاری
از بس منی یاپراق كیمی هجرانلار سارالدیب
باخسان اوزونه سانكی قیزیل گولدی قیزاری
محراب شفقده ئوزومی سجده ده گوردوم
قان ایچره غمیم یوخ اوزوم اولسون سنه ساری
عشق واریدی شهریارین گللی چیچكلی
افسوس قارا یل اسدی خزان اولدی بهاری

شهـــــــریار

حیدربابا ، ایلدیریملار شاخاندا
سئللر ، سولار ، شاققیلدییوب آخاندا
قیزلار اوْنا صف باغلییوب باخاندا
سلام اولسون شوْكتوْزه ، ائلوْزه !
منیم دا بیر آدیم گلسین دیلوْزه

حیدربابا ، كهلیكلروْن اوچاندا
كوْل دیبینَّن دوْشان قالخوب ، قاچاندا
باخچالارون چیچكلنوْب ، آچاندا
بیزدن ده بیر موْمكوْن اوْلسا یاد ائله
آچیلمیان اوْركلرى شاد ائله

بایرام یئلى چارداخلارى ییخاندا
نوْروز گوْلى ، قارچیچكى ، چیخاندا
آغ بولوتلار كؤینكلرین سیخاندا
بیزدن ده بیر یاد ائلییه ن ساغ اوْلسون
دردلریمیز قوْى دیّكلسین ، داغ اوْلسون

حیدربابا ، گوْن دالووى داغلاسین !
اوْزوْن گوْلسوْن ، بولاخلارون آغلاسین !
اوشاخلارون بیر دسته گوْل باغلاسین !
یئل گلنده ، وئر گتیرسین بویانا
بلكه منیم یاتمیش بختیم اوْیانا

حیدربابا ،‌ سنوْن اوْزوْن آغ اوْلسون !
دؤرت بیر یانون بولاغ اوْلسون باغ اوْلسون !
بیزدن سوْرا سنوْن باشون ساغ اوْلسون !
دوْنیا قضوْ-قدر ، اؤلوْم-ایتیمدى
دوْنیا بوْیى اوْغولسوزدى ، یئتیمدى

حیدربابا ، یوْلوم سنَّن كج اوْلدى
عؤمروْم كئچدى ، گلممه دیم ، گئج اوْلدى
هئچ بیلمه دیم گؤزللروْن نئج اوْلدى
بیلمزیدیم دؤنگه لر وار ،‌ دؤنوْم وار
ایتگین لیك وار ، آیریلیق وار ، اوْلوْم وار

بیزی یاندیریر ، یامان آیریلیق                    بو داریخدیران دومان آیریلیق
باشا ساووریر سامان آیریلیق                      آمان آیریلیق ، آمان آیریلیق

بیر گؤزون آچار ، بیر گؤزون یومار                      آرازی سرین گؤردیكده اومار
خزری درین گؤردوكجه جومار                    قان دریاسینا جومان آیریلیق

                             آمان آیریلیق ، آمان آیریلیق

آرازیم وورسون باش ، داشدان داشا                    گؤز یاشی گرك باشلاردان آشا
نئجه یاد اولسون ، قارداش - قارداشا                        نه دین قانیر ، نه ایمان آیریلیق

                             آمان آیریلیق ، آمان آیریلیق

گؤیلرین ، گونون - آیین گیزلدیر                      اولدوز آخدیریر ، سایین گیزله دیر
اوخونی آتیر ، یایین گیزلدیر                         قدیمی ائدیب كمان آیریلیق

                             آمان آیریلیق ، آمان آیریلیق

آیریلیق گله ، بیر كرم قیلا                         بیر نئچه گون ده ، بیزدن آیریلا
غم ده بیز تك سووا ساوریلا                          هانی بیر بئله گومان آیریلیق
                             آمان آیریلیق ، آمان آیریلیق

دئدیم آیریلیق ، قیناما منی                          سنی گؤرموشم ائللر دشمنی
یوزمین كره ده سیناسام سنی                         همان آیریلیق ، همان آیریلیق

                             آمان آیریلیق ، آمان آیریلیق

آمانسیز گؤزون یومان آیریلیق                         جان جیزلیغیندان اومان آیریلیق
نه غملی یازار (دومان) آیریلیق                          دیللره سالان دومان آیریلیق

                             آمان آیریلیق ، آمان آیریلیق

سن اونودسان دا(سلیمان) منی                          اونودمیاجاق «شهریار» سنی
یاز گله ر ،بولبول قاپسار چمنی                        ایندی لیك سه وسون زمان آیریلیق

                             آمان آیریلیق ، آمان آیریلیق

شهریار