شاه داغیم ،
چال پاپاغیم ،
ائل دایاغیم ،
شانلی سهندیم
باشی طوفانلی سهندیم
باشدا حیدر بابا تك قارلا قیروولا قاریشیب سان
سون ایپك تئللی بولودلارلا افقده ساریشیب سان
ساواشاركن باریشیب سان
گویدن الهام آلالی سرری سماواته دئیه رسن
هله آغ كوركی بورون ، یازدا یاشیل دون دا گئیه رسن
قورادان حالوا یئیه رسن
دوشلرونده صونالار سینه سی تك شوخ ممه لرده
نه شیرین چشمه لرین وار
اویاشیل تئللری ، یئل هورمه ده آینالی سحرده
عشوه لی ائشمه لرین وار
قوی یاغیش یاغسادا یا غسین
سئل اولوب آخسادا آخسین
یانلاروندا دره لر وار
قوی قلمقاشلارین اوچسون فره لرله ، هامی باخسین
دوشلرونده هئره لروار
او اتك لرده نه قیزلار یاناغی لاله لرین وار
گول چیچكدن بزه ننده ، نه گلین لركیمی نازین
یئل اسنده اوسولاردا نه درین راز نیازین
اوینایار گوللوقوتازین
تیتره ییر ساز تئلی تك شاخه لرین چایدا چمنده
یئل او تئلرده گزه نده ، نه كوراوغلی چالی سازین
اورده گون خلوت ائدیب گولده پری لرله چیمنده
قول قانادان اونا آغ حوله آچار غمزه لی قازین
قیش گئده ر ، قوی گله یازین
هله نوروز گلی وار ، قار چیچگین وار ، گله جكلر
سئل ، یاغیشدا یویونار كن ده گونش له گوله جكلر
اوزلرین تئز سیله جكلر
قیشدا كهلیك هوسی له ، چوله قاچدیقدا جوانلار
قاردا قاققیلدا یاراق نازلی قلمقاشلارین اولسون
یاز ، او دوشلرده ناهار منده سین آچدیقدا چوبانلار
بوللی ، سودلی سورولر ، دادلی قاووتماشلارین اولسون
آد آلیب سندن او شاعر كی ، سن اوندان آدآلارسان
اونا هر داد وئره سن یوز او مقابل داد آلارسان
تاریدان هر زاد آلارسان
آداش اولدوقدا ، سن اونلا ، داها آرتیق اوجالارسان
باش اوجالدیقدا دماوند داغیندان باج آلارسان
شئر الیندن تاج آلارسان
اودا ، شعرین ، ادبین شاه داغیدیر ، شانلی سهندی
اودا ، سیمرغ دن آلماقدادی فندی
شعر یازاندا قلمیندن باخاسان در سپه لندی
سانكی اولدوزلار الندی
سوز دئینده گوروسن قاتدی گولی ، پسته نی ، قندی
یاشاسین شاعر افندی
اونه شاعر ، كی داغین وصفینه مصداق اونی گوردوم
من سنون تك اوجالیق مشقینه مشاق اونی گوردوم
عشقه ، عشق اهلینه مشتاق اونی گوردوم
اونه شاعر ، كی خیال مركبینه شووشیغایاندا
او نهنگ آت آیاغین توزلی بولودلاردا قویاندا
لوله لنمكده دی یئر - گوی نئجه طومار ساریاندا
گوره جكسن او زماندا
نه زمان وارسا ، مكان وارسا كسیب بیچدی بیر آندا
گئچه جكلر ، گله جكلر نه بویاندا ، نه اویاندا
نه بیلیم قالدی هایاندا؟
باخ نه حرمت وار اونون ئوزدئمیشی توك پاپاغیندا
شعرینین تاجی اگیلمیش باشی دورموش قاباغیندا
باشینا ساوریلان اینجی ، چاریق اولموش آیاغیندا
وحی دیر شعری ، ملك لردی پیچیلدیر قولاغیندا
شهدی وار بال دوداغیندا
اودا داغلار كیمی شانینده نه یازسام یاراشاندیر
اودا ظالم قوپاران قارلا كولك له دوروشاندیر
قودوزا ، ظالمه قارشی سینه گرمیش ، ووروشاندیر
قودوزون كوركنه ، ظالم بیره لر تك داراشاندیر
آمما وجهینده فقیر خلقی اگیلمیش سوروشاندیر
قارا ملتده هنر بولسا هنر له آراشاندیر
قارالارلا قاریشاندیر
ساریشاندیر
گئجه حققین گوزودیر ، طور تورتمیش اوجاغیندا
اری ییب یاغ تك اوركلردی یانیرلار چیراغیندا
می ، محبتدن ایچیب لاله بیتیبدیر یاناغیندا
او بیر اوغلان كی ، پری لر سو ایچرلر چاناغیندا
اینجی قاینار بولاغیندا
طبعی بیر سوگلی بولبول كی ، اوخور گول بوداغیندا
ساری سونبول قوجاغیندا
سولار افسانه دی سویله ر اونون افسونلی باغیندا
سحرین چنلی چاغیندا
شاعرین ذوقی ، نه افسونلی ، نه افسانه لی باغلار
آی نه باغلاركی ((الف لیلی )) ده افسانه ده باغلار
اودیاخیب ، داغلاری داغلار
گول گولرسه بولاغ آغلار
شاعرین عالمی ئولمز ، اونا عالمده زوال یوخ
آرزیلار اوردا خاطرلیه امكاندی ، محال یوخ
باغ جنت كیمی اوردا بو حرام دیر بوحلال یوخ
اومحبتده ملال یوخ
اوردا حال دیر داها قال یوخ
گئجه لر اوردا گوموشدندی ، قیزیلدان نه گونوزلر
نه زمرد كیمی باغلاردی ، نه مرمر كیمی دوزلر
نه ساری تئللی اینكلر ، نه آلا گوزلو ئوكوزلر
آی نئجه آی كیمی اوزلر؟
گول آغاجلاری نه طاوس كیمی چترین آچیب الوان
حلله كروانیدی چوللر ، بزه نر سورسه بو كروان
دوه كروانی دا داغلار ، یوكی اطلس دی بو حیوان
صابرین شهرینه دوغرو ، قاطاری چكمه ده سروان
او خیالیمداكی شیروان
اور دا قاردا یاغار ، آمما داها گوللر سولا بیلمز
بو طبیعت ،او طراوتده محال دیر اولا بیلمز
عومر پیمانه سی اوردا دولا بیلمز
او افقلرده باخارسان نه ده نیزلر ، نه بوغازلار
نه پریلر كیمی قوشلار قونوب ، اوچماقدا ن قاز لار
گولده چیممكده نه قیزلار
بالیغ اولدوز كیمی گوللرده ، ده نیز لرده پاریلدار
آبشار مرواری سین سئل كیمی توكدوكده خاریلدار
یئل كوشولدار ، سو شاریلدار
