چوخ ییرغالانیب قاش گؤزونو آتما آی اوغلان
توركم منه چوخ فارسی قیریلداتما آی اوغلان
علم اولماسا موشگول دونوب آسان اولا بیلمز
ائـلـلر سؤزودور تولـكودن اصـلان اولا بـیـلمز
ائل درد و غمین قانمـایـان اینسان اولا بـیلمز
هرزه گـولـو ائـل گـولـلرینـه قـاتمـا آی اوغلان
توركم منه چوخ فارسی قیریلداتما آی اوغلان
آرتیـق چالیـشیب دوزلره اوخشـاتما یـالانی
تـوركـون آتـیـنا تیـكمه یـاراشـدیـرما پـالانی
آز بـیـلمه دمـاونـدیـدن اوغـلان ســاوالانی
ائل قارغیش ائدر بوغدا وئریب ساققیز آلانی
میـسدن اؤتـری آغ قیزیلی ساتما آی اوغلان
توركم منه چوخ فارسی قیریلداتما آی اوغلان
باخ تاریخه گؤر كیم ده ده وه خور باخیب اوغلان
اینسـان آدینـی دفتـره كیـم یـازدیـریـب اوغـلان
كیـم بــابـكی سـاتـدی عربـه خانـه سی ویران
كیـم ائـتـدی خیــانـت بـؤلـونـوب آزربــایـجــان
غفـلت یـوخوسونـدا بو قدر یـاتـما آی اوغلان
توركم منه چوخ فارسی قیریلداتما آی اوغلان
مشروطـه لیـگی كیـم گتیـریب ایـرانا یولداش
ستتار خـانی كیـملر چـاغیریب تهـرانا یولداش
دالدان كیم آتیب گولله نی ستتار خانا یولداش
كیـم قـاره باغی هدیـه وئـریب ایـروانا یولداش
بسدیر باشا دوش باغریمی چاتداتما آی اوغلان
تـوركم منـه چـوخ فارسی قیریلداتما آی اوغلان
بـیـز یـانـدیـران اودلاردا بـو گـون یـانـدی اوشاقلار
پـیـس گـونـده،یـامـان یـئـرده آیـاقلانـدی اوشاقلار
داندیق دیلی بیز ریشه سی نی داندی اوشاقلار
ایـنـدی بـیـزه یـوخ یـادلارا قـوربـانـدی اوشــاقلار
بوش بوش دانیشیب بئینیمی لاخلاتما آی اوغلان
تـوركـم مـنـه چـوخ فـارسی قیـریلداتـما آی اوغلان
من سؤیـله میـرم دیـلـلری اؤرگشـمه دانیشما
یانسین اوره گیم باشی دئسم فارسا قاریشما
آنـجـاق دئـیـیـرم یـادلارا چــوخ یـانـمـا آلیـشـما
هـر كیـم ائـلیـنی دانسا،كوسوب اونلا باریشما
گولسن ، خار اولوب ائل گؤزینه باتما آی اوغلان
تـوركم منـه چـوخ فارسی قیـریلداتما آی اوغلان
دوشـمان اوزووه گـولسه ایـنان تـازه كلك دی
پـروانـه ده یـیر شمـعلـره اوغـلان كپـنـك دی
آیریلمازا واجیب سؤزون آشكارا دئمك دی
توركون دیلینین اوستادی آللاه دی دئمك دی
شئـیـطـانی اهـورا بـئـلینه چـاتـما آی اوغلان
توركم منه چوخ فارسی قیریلداتما آی اوغلان
آیریلماز
يازينين قالاني
