ائلیمین گوللری سولمایان كیمی

دریالار  اوسگویه دولمایان كیمی

توتولوب اولمایان كیمی

اوچماقدیر دیلگیم قانات وئر منه

غم توزون آپارمیر گؤزومون سئلی

سوسدوروب دیلیمی ننه لیك فئلی

دردیمی توكنمز حیات وئر منه

چال سازی ، سسینده سؤزومو دئییم

قال رنگین گؤسترمز دونومو گئییم

واردیر چارپیشماغا  هله لیك هئییم

گئدیرم چنلی یول، قیرآت وئر منه

جانیملا وارلیغیم، واریم دیدیشیر

اوخ قالیب سوموكده  یارا بیتیشیر

حیاتیم بوش-بوشا  باشا یئتیشیر

بوسون گونلریمده ثبات وئرمنه

قولوما قارداشدان دایاق ایستیرم

دیلیمه ائلیمدن سایاق ایستیرم

دنیزلر توتوملو  چاناق ایستیرم

دردیمی یازماغا داوات وئر منه

سحرخانیم

    

سیغماییر ایستـكلریم منطقلرین اركانینا

ایسته ییر  عنوان اولوم دیوانه لر دیوانینا

سن آچان گونــدن قاپانمیش یوللاری رؤیالره

مین دیلك ایلمك له نیر هردم كونول دامانینا

هانسی یوللاردان گلیرسن گؤیده اولدوزلار گولور

چن دوشور حسرت قباسیندان باخیش میـدانینا

سن دوننلر باغــچاسیندا اكدیگیم بیر آرزوسان

گئج بئجردین دوشمدی كؤلگن گؤروش ایوانینا

دامجی-دامجی قان دامیركن، قلبیمین پیمانه سی

دالـــغا-دالـــغا یوكســلیر میــدان وئریر طوفـانیـــــنا

قوی اؤره ك دریای عشق اولسون،بوتون وارلیق كیمی

قــــوی چئویرسین  دالغـــالار دونیـــانی قان عمــــانینا

سحرخانیم

دالغالی گؤللرینه آند ایچیرم

دامغالی اللرینه آند ایچیرم

قویماریق باغلی قالا قوللاریمیز

قورویا گول-بوتاغیمیز ، خوللاریمیز

یئته دوستاق دیبینه یوللاریمیز

باغلانان قوللارینا آند ایچیرم

كسیلن یوللارینا آند ایچیرم

قویماریق آل گونشین رنگی سولا

قورخولوق یوردوموزا كؤلگه سالا

چن توتا  آرزو یولون ، گؤز قارالا

آغاران تئللرینه آند ایچیرم

چن توتان بئللرینه آند ایچیرم

قویماریق غم دنیزی داغالانا

گتیره تولكو فئلی خلقی جانا

اودوموز  اؤزگه اوجاغیندا یانا

سارالان گوللرینه آند ایچیرم

ساری بولبوللرینه آند ایچیرم

یازاریق قوچ نبی نین  شانلی سؤزون

چالاریق سازدا ائلین جانلی سؤزون

دویاریق خان آرازین قانلی سؤزون

سارالی سئللرینه آند ایچیرم

یارالی ائل لرینه  آند ایچیرم

سحرخانیم

حسرت یاش اولوب گوزللره دولماقدادی،دای گل!

گوزیاشلاری آخماقدا سئل اولماقدادی،دای گل!

هجران توری دونیانی قفس تك بورویوبدور

 دنیاكیمی ،باغریمدا دارالماقدادی،دای گل!

 سال داغلارا های،گؤیده بولودلار دیله گلسین

 یاپراق كیمی وارلیق بویو سولماقدادی،دای گل!

 هجرینده گئچن لحظه لری یانقلی سازتك

 غم پنجه سی،آه زخمه سی،چالماقدادی،دای گل!

 سنسیزلیگه دؤزمك نه سایاق ممكن اولارمیش

 دؤزودوم،دؤزوموم جانیمی آلماقدادی،دای گل!

 گل قوی گؤنشین بایداسی دنیایه جالانسین

 باغریمدا قارانلیق ایزی قالماقدادی،دای گل!

 یاتماز، یولونو گؤزلریم اولدوزكیمی گؤزلر

 گؤزلر كؤكو، حسرتله سارالماقدادی،دای گل!

 هرگؤن “سحر” آددیملارینین ماهنیسین ایزلر

 چمیش سحرین باغری قارالماقدادی،دای گل!

سحر خانیم