آختاردیم ، آراشدیم ، بو گؤزل جانلار ایچینده

سئودیم سنی جانیم كیمی، جانانلار ایچینده

پیمان دوز،ایلقاری بوتون ، قلبی صفالی

بخت اولدوزوسان دوغروسو ، نسوانلار ایچینده

كافر دئسه لر آدیما عشقینده، غمیم یوخ

قوی كافر اولوم  ،بعضی مسلمانلار ایچینده

عؤمرو باشا وئردیم بو سایاق، آز منه سؤیله:

اولماز یاشاماق ساده دل انسانلار ایچینده

مردانه دایاننام ، باشیمی اگمه-رم  اؤلسم

انسان دئیلن، بیر سورو، حیوانلار ایچینده

انسانلیغین عالی هدفی، پاك مرامی

محو اولدو ندن ،بیر پارا عنوانلار ایچینده؟

عارفلره، زاهد سؤزو بیر (تنبله) دگمز

تولكو نه ائدر بیر سورو ، اصلانلار ایچینده

چیخدیم فلكین،هریاریشیندان، سیناغیندان

چالدیم ال-آیاق شوقیله آلقانلار ایچینده

طوفان قوشو تك ،حادثه لر قارشینا چیخدیم

گه-ردیم سینه می نعره لی طوفانلار ایچینده

نوش ایسته دیم افسوس كی نیش اولدو نصیبیم

مین درده ایریشدیم یئنه درمانلار ایچینده

بو شهرده افسانه اولوب ،شهرته چاتدیم

سؤیلندی آدیم (بوی)كیمی دستانلار ایچینده

آل ائتدی رقیبیم منه، آلقانه بلشدیم

یاتدیم اصیل اصلان كیمی، زندانلار ایچینده

زنبور ائوی تك ،اولدو اؤرك  جوریله شان-شان

یاتمیش بدنیم ،ائیله كی پیكانلار ایچینده

داغلار كیمی ،چوخ فیرتینالار،آشدی باشیمدان

یاندیم ،كؤله دؤندوم ، ده لی  وولقانلار ایچینده

عصیان یارادان خلقیمین اؤز اوغلو ، منم-من

باش قووزامیشام ، قورخولو طوفانلار ایچینده

دائم اوره ییم  نئی كیمی افغان ائله ییر چون:

خاطر ،جمع اولانماز ،بو پریشانلار ایچینده

فرمان وئریر  عصریم كی ، وطن خصمینی محم ائت

قوی قانلار آخا، بیر بئله فرمانلار ایچینده

یوخسول لار آرا مهروصداقت هله واردیر

بوعالی صفت لر  اؤلوب  اعیانلار ایچینده

اؤز منلیگینی ساتمادی شیدا  اونا احسن

قالدی آدی، دونیا بویو ، اوغلانلار ایچینده

استاد یحیی شیدا