عاشقه آل ائیلیر ، هر باخیشیندا
عشولی ، غمزه لی ، آلا گؤزلرین
او سوزگون باخیشدا، بیلمیرم نه وار؟
گتیریر حالسیزی ، حالا گؤزلرین
روحومو او آجی باخیشلار سیخیب
خومار نرگیزلرین اره نلر ییخیب
قورخورام بوسقودان قارتال تك چیخیب
گؤیرچین قلبیمی، چالا گؤزلرین
آجی باخماغیندا ، شیریندیر منه
سنسن یاراشیقلی ، ائله ، وطنه
حسرتله گؤز آلتی ، باخاندا سنه
هاندادیر ، جانیمی آلا گؤزلرین
سنسیز اؤره ك نئجه دؤزر ، دایانار؟
اود توتار وجودوم شام تكین یانار
نفسیم كسیلر ، قلبیم دایانار
اگر منی گؤزدن سالا گؤزلرین
شیدانی بیر عؤمور ، ائیله دین ناكام
اولمادی اؤره یی بیر لحظه آرام
ایسته رم خدادان هر سحر-آخشام
منیم تك حسرتده ، قالا گؤزلرین
استاد یحیی شیدا
