جمالین شمعینه،جانا ، یانارپروانه لر بیر بیر
چكر زنجیرِ زولفون حسرتین دیوانه‌لر بیر بیر
ائدر عشاق كؤنلون جمع ایكن آشفته هر ساعت
پریلر زولفونه دگدیگجه، ای دل، شانه‌لر بیر بیر
یئنه بیلمم نه افسون ائیله‌میش جادویِ چشمانین
كه دگمیش بیر بیرینه مردم فرزانه‌لر بیر بیر
نه مئی‌دیر، گؤزلرین قوربانی، بیلمم باده‌ی عشقین
كی، ایچدیكجه تاپار هشیارلیق مستانه‌لر بیر بیر
لبین اؤپمك خیالیله دلِ ساغر اولوب پر خون
اول حسرتله گزه‌ر الدن اله پیمانه‌لر بیر بیر
دهانیندن اثر یوخدور، دئمیشلر، شرطی وار، آمما
یئتر تحقیقینه شرح ائتسه‌لر فرزانه‌لر بیر بیر
عرق درمی دوزولمش عارضِ آلیندا سر تا سر؟
گول اوزره ژاله‌دیر، یا اینكی اول دوردانه‌لر بیر بیر
مذاقِ لعلینی گؤرمشله، دئرلر جامِ مئی ایچره
شرفیاب اول جهت‌دن‌دیر اولوب میخانه‌لر بیر بیر
آییلماز جهل اهلی، واحید، هرگز خوابِ غفلتدن
مگر اهلِ ریادن ترك اولا افسانه‌لر بیر بیر
علی آقا واحید
