بوگؤروشو درده درمان بیلمیشدیم
حسرتیندن چوخ آغلاییب گولموشدوم
گؤوروشونه بیر قیش گونو گلمیشدیم
ِای قار آلتیندا اؤره یی یاز تبریزیم
چؤرگی بول، قسمتی آز تبریزیم.
چیچكلندین،باهار بیلدیم قیشینی
كؤكسون سیخدین،جانلی ساندیم داشینی
قارلا یودوم،گیزله دیم گؤز یاشینی
ایش اوستا سی،سؤز بئجری تبریزیم
گؤز یاشینا اؤیرنجه لی تبریزیم.
دالغاییدین عمانینا قووشدون
زواریدن كروانینا قووشدون
آزادلیغا، گومانینا قووشدون
آزادلیغین ایلك سنگری تبریزیم
تاریخ لرین شاه اثری تبریزیم.
نه گؤزله دی ؟نه آختاردی ؟نه بولدو ؟
نه بولدونسا اؤره یییمه قبول دو!
بو سویوخلوق نه زاماندان دب اولدو؟
اولادینی قوناق بیلن تبریزیم
دردینه ده دییب گولن تبریزیم.
قدرتینه شك ایلیه بیلمه دیم
قوجا اركَه ارك ایلیه بیلمدیم
نه یاتیرسان درك ایلیه بیلمدیم
ای دونیانی یولا سالان تبریزیم
ای كروان دان دالا قالان تبریزیم.
جنتینی سنده تاپان چوخ ایدی
سؤزون وارسا داشدان كئچن اوخ ایدی
"نیویورك"لار"لوندورا"لار یوخ ایدی
اؤز یئرینده سایین دوران تبریزیم
نوكرلره بویون بوران تبریزیم.
قیلینجا یوخ یاغلی سؤزه اییلدین
دوشمنه یوخ دوست قارداشا دؤیولدون
تاریخ بویو بئله مظلوم دییلدین
اومید بورجوم ،ظفر طاقیم تبریزیم
گولله دئیمیش سؤز بایراقیم تبریزم.
باكی سندن سن باكی دان اوممادا
دونوق قانلار اؤزگه دن قان اوممادا
اومید یوخدو بو دونیادان اوممادا
یخیق كؤنلوم، سن اؤزون قور تبریزیم
زامان گئدیر، آیاغا دور تبریزیم.
رستم خانلی
