گلمز یئره آرخام كی ائلیمدن دایاغیم وار
داغ تك دورارام هرنه آغیر دل ده داغیم وار
داغلاردان ئوز ایلهامیمی آللام یاشادیقجا
بیر كوهنه چینارم كی اوزون قول-بوداغیم وار
تاریخ بویو ائللرده آدیم سسله نه جكدیر
تا شانلی ائلیم نازلی دیلیم شن تیفاغیم وار
هر بیراثریم هردیله ییم فیكروخیالیم
ائل دن دئیه جك تاكی دیلیم وار دوداغیم وار
یول آزمامیشام آزمارام عالمده بیلیرسن
اوءتگم آنا بیر دیل كیمی نورلو مایاغیم وار
ائل قایغی سینی من چكرم جانیما منت
چون دویغولو هرسینه ده سوءنمز اوجاغیم وار
ائلدن گوج آلیب سئللره فرمان سوره رم من
سئللر-سولار آتلانسادا ائل تك دایاغیم وار
یاخشی تانیرام ساغ-سولومو ائللر ایچینده
مكتبده توتاق كیم نه سولوم وار نه ساغیم وار
فرعون زمانی چكه رم نیل هلاكه
موسی كیم دوشمان قوغان الده چوماغیم وار
یوردوم چمنین پاك ائده رم هرزه علف دن
الده قلم تك ایتی-كسگین اوراغیم وار
سئیرانه چیخاندا بو یانار سینه مه بیر باخ
باشدان باشا گوءر: لاله لی سونبوللو باغیم وار
فیكر ائیله مه بابك لر اوءلوب بیرده دیریلمز
مین لرجه بوگون اوءلكه ده بابك سوراغیم وار
آز سوءیله : حقیقت اولانی قانما ! دوشونمه !
داری دوءشورن حقی سئچن بیر قولاغیم وار
شیدا منی مین رنگه بویاندیر مادی دوءران
هر دوءرده ده اولسامدا همان بیر بویاغیم وار
استاد یحیی شیدا
